Türkiyə - Azərbaycan Universiteti 3 yeni vakansiya elan edib.
“Tehsil365" xəbər verir ki, Türkiyə-Azərbaycan Universiteti (TAU) müxtəlif sahələr üzrə üç vəzifə – mühəndis (SƏTƏM), usta-elektrik və fəhlə üzrə vakansiya elan edib.
Universitetdən verilən məlumata görə, əməyin mühafizəsi, texniki təhlükəsizlik və ətraf mühit sahəsində fəaliyyətin yüksək səviyyədə təşkili üçün SƏTƏM üzrə mühəndis axtarılır. Bu vəzifə üçün namizədlərdən müvafiq sahə üzrə ali təhsil, ən azı 3 il iş təcrübəsi, həmçinin ISO 45001 və 14001 kimi standartlar üzrə bilik və sertifikatlar tələb olunur. Eyni zamanda risklərin idarə olunması bacarığı, analitik düşüncə, məsuliyyətlilik və komandada işləmək qabiliyyəti vacib şərtlər sırasındadır.
Mühəndis vəzifəsinə qəbul olunacaq şəxs əməyin mühafizəsi və texniki təhlükəsizlik qaydalarına nəzarət etməli, risk qiymətləndirilməsi aparmalı, təhlükəsizlik təlimləri keçirməli, qəza və insidentləri araşdırmalı, ətraf mühitlə bağlı normativ tələblərin icrasını təmin etməli və müvafiq sənədləşməni həyata keçirməlidir.
Bununla yanaşı, universitet texniki xidmət sahəsində usta-elektrik vəzifəsi üzrə də vakansiya elan edib. Bu vəzifəyə namizədlərdən elektrik və ya təmir-tikinti sahəsi üzrə peşə və ya orta ixtisas təhsili, ən azı 2-3 il iş təcrübəsi, elektrik sxemlərini oxumaq bacarığı və təhlükəsizlik qaydalarına dair biliklər tələb olunur. 4-cü və ya 5-ci dərəcəli elektrik vəsiqəsinə malik olmaq üstünlük sayılır.
Usta-elektrik universitetdə elektrik avadanlıqlarının fasiləsiz işləməsini təmin etməli, nasazlıqları operativ şəkildə aradan qaldırmalı, təmir-tikinti işlərində iştirak etməli, təhlükəsizlik qaydalarına riayət olunmasına nəzarət etməli və profilaktiki texniki baxışları həyata keçirməlidir.
Digər vakansiya isə fəhlə vəzifəsi üzrədir. Bu vəzifə üçün fiziki cəhətdən sağlam, intizamlı, məsuliyyətli və komandada işləmə bacarığı olan şəxslərə üstünlük verilir. Oxşar sahədə təcrübə arzuolunandır.
Fəhlə vəzifəsinə qəbul olunacaq şəxslər universitet ərazisində gündəlik texniki və fiziki işləri yerinə yetirməli, təmizlik və səliqənin qorunmasına dəstək verməli, yüklərin daşınması və yerləşdirilməsini həyata keçirməli, həmçinin rəhbərlik tərəfindən verilən digər tapşırıqları icra etməlidirlər.
Hər üç vəzifə üzrə iş qrafiki 5 günlük iş həftəsi, iş saatı 09:00-dan 18:00-dək nəzərdə tutulub. Əmək haqqının məbləği isə müsahibə əsasında müəyyən olunacaq.