Onun sözlərinə görə, öncə hər kəs öz daxili psixologiyasına diqqət yetirməli, travmaların hansı dərəcədə təsir etdiyini dəyərləndirməli və hansı mövzularda korreksiyaya ehtiyac olduğunu anlamalıdır.
Klinik psixoloq Fəridə Musəvi “Tehsil365”ə açıqlamasında bildirib ki, insanlar çox vaxt psixoloji sağlamlıqlarını unudaraq bütün problemləri ətraf mühitin üzərinə yükləyirlər.
Musəvi qeyd edib ki, “ətrafımızda olan insanlar — ailə üzvləri, dostlar, müəllimlər — bizim həyatımızda mühüm rol oynayır və onların davranışları, ünsiyyət tərzi psixologiyamıza mütləq təsir göstərir.” O əlavə edib ki, müəllimlərin gənclərin psixologiyasına təsiri də az deyil. “Əgər bir müəllim şagirdin və ya tələbənin səhvini auditoriya qarşısında sərt şəkildə üzünə vurursa, onu kiçildirsə, bu həmin gəncdə köklü bir travma yarada bilər,” – deyə psixoloq vurğulayıb.
Onun sözlərinə görə, bu təsirin dərəcəsi şəxsin öz psixoloji gücündən asılıdır. “Kiminsə psixoloji dayanıqlığı güclüdürsə, o, bu cür davranışlardan daha az təsirlənir. Amma zəif psixoloji müdafiə mexanizmləri olan gənclərdə bu, uzunmüddətli travmaya çevrilə bilər,” – deyə Musəvi bildirib.
Psixoloq əlavə edib ki, sağlam psixologiyanın qorunması üçün həm fərdi güc, həm də ətraf mühitin dəstəyi vacibdir. “Biz yalnız özümüzü deyil, həyatımızda mühüm rol oynayan insanların davranışlarını da nəzərə almalıyıq. Çünki onların ünsiyyət tərzi bizim psixoloji vəziyyətimizə birbaşa təsir edir,” – deyə Fəridə Musəvi qeyd edib.