Onun sözlərinə görə, bu fənn Vətən müharibəsindən əvvəl də diqqət mərkəzində idi, lakin müharibədən sonra daha da zənginləşdi. “Artıq döyüş təcrübəsi olan müəllimlərin məktəblərdə dərs deməsi şagirdlərin marağını artırdı və onların hərbi hazırlığa yanaşmasını dəyişdi,” – deyə Ramaldanov vurğulayıb
Hərbi ekspert Şair Ramaldanov “Tehsil365”ə açıqlamasında bildirib ki, Azərbaycanda məktəblərdə hərbi hazırlıq dərsləri uzun illərdir müəyyən proqram əsasında təşkil olunur. .
Ekspert qeyd edib ki, vətənpərvərlik ruhunun formalaşmasında məktəbin xüsusi rolu var. “Məktəbdə keçirilən tədbirlərlə yanaşı, hərbi hazırlıq dərsləri də bu ruhun güclənməsinə bilavasitə təsir göstərir. Çünki vətənpərvərlik ruhu yüksək olmayan şagird hərbi hazırlıqda da yaxşı nəticə əldə edə bilməz,” – deyə o əlavə edib.
Ramaldanov bildirib ki, müasir müharibələrin gedişatı göstərir: yalnız klassik silahlarla tanışlıq kifayət etmir. “Bu gün orduda rəqəmsal avadanlıqlar, pilotsuz uçuş aparatları geniş istifadə olunur. Ona görə də məktəblərdə bu texnologiyaların öyrədilməsi, sadə dronların yığılması, dərnəklərin təşkili gənclərin marağını artırar və onların gələcəkdə hərbi xidmətə daha hazırlıqlı gəlməsinə kömək edər,” – deyə ekspert vurğulayıb.
Onun sözlərinə görə, hərbi hazırlıq dərslərinin keyfiyyəti birbaşa tədris bazasından asılıdır. “Proqram nə qədər güclü olsa da, tədris zəifdirsə, yaxşı nəticə əldə etmək çətin olacaq. Təhlükəsizlik məsələləri yüksək səviyyədə təmin olunmalı, biliklərin mənimsənilməsi əsas prioritet olmalıdır,” – deyə Ramaldanov qeyd edib.
Ekspert əlavə edib ki, paytaxt məktəblərində hərbi hazırlıq dərslərinin keyfiyyəti daha yüksəkdir, lakin rayonlarda bu sahədə çatışmazlıqlar müşahidə olunur. “Müdafiə sənayesinin inkişafı ilə bağlı biliklərin məktəblərdə tədris olunması istisna deyil. Əgər şagirdlər müdafiə sahəsində praktiki təlimlərdə iştirak etsələr, həm maraqları artar, həm də ölkənin müdafiə potensialı ilə yaxından tanış olarlar,” – deyə Ramaldanov bildirib.
Onun fikrincə, hərbi hazırlıq dərslərinin maraqlı və keyfiyyətli təşkili gənclərin gələcəkdə hərbi xidmətə daha bilikli və hazırlıqlı başlaması üçün vacibdir. “Bu fənn özəllik tələb edir və gənclərin psixoloji, intellektual və praktiki hazırlığının formalaşmasında mühüm rol oynayır,” – deyə hərbi ekspert Şair Ramaldanov vurğulayıb.