Müasir dövrdə texnologiya həyatımızın ayrılmaz hissəsinə çevrilib. Bu isə uşaqların erkən yaşlardan etibarən texnologiya ilə tanış olması məsələsini gündəmə gətirir.
Mövzu ilə bağlı İT mütəxəssisi Fərid Kazımov “Tehsil365"ə açıqlama verib.
İT mütəxəssisinin sözlərinə görə, uşaqların texnologiya ilə erkən yaşda tanış olması tamamilə yanlış deyil, lakin bu proses nəzarətli və məqsədyönlü şəkildə həyata keçirilməlidir: “Texnologiya düzgün istifadə edildikdə uşaqların öyrənmə imkanlarını genişləndirə, onların maraq dairəsini artıraraq yeni bacarıqlar qazanmalarına kömək edə bilər.”
Mütəxəssis qeyd edib ki, əsas məsələ texnologiyanın istifadə müddəti və məzmunudur: “Uşaqların yaşına uyğun, maarifləndirici və inkişafyönümlü kontent seçilməsi vacibdir. Eyni zamanda ekran qarşısında keçirilən vaxt məhdudlaşdırılmalıdır.”
Onun sözlərinə görə, nəzarətsiz istifadə müəyyən risklər yarada bilər: “Uzun müddət texnologiyadan istifadə uşaqlarda diqqət dağınıqlığı, sosial ünsiyyətin azalması və asılılıq kimi problemlərə səbəb ola bilər.”
İT mütəxəssisi əlavə edib ki, valideynlərin rolu bu prosesdə həlledicidir: “Valideynlər uşaqlara texnologiyadan düzgün istifadə vərdişləri aşılamalı, onları həm rəqəmsal, həm də real həyat fəaliyyətlərinə yönləndirməlidirlər.”
Sonda mütəxəssis vurğulayıb ki, texnologiya qadağan edilməli deyil, düzgün idarə olunmalıdır: “Balanslı yanaşma tətbiq olunduğu halda texnologiya uşaqlar üçün faydalı alətə çevrilə bilər.”