“Riyaziyyat fənnində uğur qazanmaq üçün əzbərləməkdən çox, məntiqi düşüncə qabiliyyətinin inkişaf etdirilməsi vacibdir”.
Bu sözləri “Tehsil365”ə açıqlamasında riyaziyyat müəllimi Arif Əliyev bildirib.
Müəllim qeyd edib ki, bəzi şagirdlər yalnız qaydaları əzbərləməklə kifayətlənir, lakin məsələlərin mahiyyətini tam anlamadıqları üçün yeni tip suallarla qarşılaşdıqda çətinlik yaşayırlar. Onun sözlərinə görə, riyaziyyat düşünmə və analiz etmə tələb edən fəndir.
“Şagirdlər məsələnin məntiqini anladıqda eyni tipli deyil, fərqli formalı sualları da rahatlıqla həll edə bilirlər,” — deyə Arif Əliyev vurğulayıb.
O əlavə edib ki, məntiqi düşüncəni inkişaf etdirmək üçün şagirdlərə müxtəlif tipli və çətinlik səviyyəsi fərqli olan tapşırıqlar təqdim olunmalıdır. Bu, onların analiz bacarığını artırır və problemlərə fərqli yanaşma imkanı yaradır.
“Yalnız sadə məsələlər üzərində işləmək kifayət deyil. Şagirdlər çətin suallarla da qarşılaşmalı və onları həll etməyə çalışmalıdır,” — deyə müəllim qeyd edib.
Arif Əliyevin sözlərinə görə, müəllimlərin dərs zamanı izahı sadə və aydın qurması, real həyatdan nümunələr gətirməsi şagirdlərin mövzunu daha yaxşı qavramasına kömək edir.
“Riyaziyyatı gündəlik həyatla əlaqələndirmək şagirdlər üçün mövzunu daha anlaşıqlı və maraqlı edir,” — deyə o əlavə edib.
Müəllim bildirib ki, davamlı məşq, düzgün istiqamətləndirmə və məntiqi yanaşma riyaziyyatda yüksək nəticə əldə etməyin əsas şərtləridir.