Son illərdə qidalanma ilə bağlı müxtəlif trendlər və məlumatlar geniş yayılıb. Bu isə insanların düzgün və sağlam seçim etməsini çətinləşdirir.
Mövzu ilə bağlı Məhsəti Hüseynova, Qida təhlükəsizliyi Hərəkatının rəhbəri, Sağlam qidalanma mütəxəssisi həmsöhbət olduq.
– Müasir dövrdə ən çox rast gəlinən qidalanma səhvləri hansılardır?
– Ən çox rast gəlinən səhvlərdən biri balanssız qidalanmadır. İnsanlar ya həddindən artıq kalori qəbul edir, ya da əksinə, lazım olan qida maddələrini kifayət qədər almır. Həmçinin hazır və işlənmiş qidaların çox istifadəsi də ciddi problemlərə səbəb olur.
– Sosial şəbəkələrdə yayılan dietalar nə dərəcədə etibarlıdır?
– Sosial şəbəkələrdə yayılan dietaların böyük əksəriyyəti fərdi xüsusiyyətlər nəzərə alınmadan təqdim olunur. Bu cür dietalar qısa müddətli nəticə versə də, uzunmüddətli sağlamlıq problemlərinə yol aça bilər. Ona görə də dietalar mütləq mütəxəssis nəzarəti ilə tətbiq olunmalıdır.
– Fast food-un uşaqların inkişafına uzunmüddətli təsiri nədir?
– Fast food məhsulları adətən yüksək yağ, şəkər və duz tərkibli olur. Bu isə uşaqlarda piylənmə, vitamin çatışmazlığı və hətta gələcəkdə xroniki xəstəliklərin yaranma riskini artırır. Eyni zamanda bu qidalar uşaqların düzgün qidalanma vərdişlərinin formalaşmasına da mənfi təsir edir.
– Sağlam qidalanma ilə psixoloji vəziyyət arasında əlaqə varmı?
– Bəli, birbaşa əlaqə var. Qidalanma insanın həm fiziki, həm də psixoloji vəziyyətinə təsir edir. Məsələn, qeyri-sağlam qidalanma yorğunluq, diqqət zəifliyi və hətta əhval dəyişikliklərinə səbəb ola bilər. Balanslı qidalanma isə enerji səviyyəsini və ümumi rifahı artırır.
– Arıqlamaq istəyənlər üçün ən təhlükəsiz və effektiv yanaşma hansıdır?
– Ən doğru yanaşma sürətli nəticə yox, davamlı və sağlam nəticəyə fokuslanmaqdır. Bunun üçün balanslı qidalanma, fiziki aktivlik və düzgün həyat tərzi vacibdir. Kəskin dietalardan uzaq durmaq və fərdi proqram əsasında hərəkət etmək daha effektiv və təhlükəsizdir.