Gənclərin siyasətə marağının artırılması müasir cəmiyyət üçün mühüm məsələlərdən biri hesab olunur.
Mövzu ilə bağlı deputat Elnarə Akimova “Tehsil365"ə açıqlama verib.
Deputatın sözlərinə görə, siyasətə maraq yalnız gündəlik xəbərləri izləmək və ya müzakirələrdə iştirak etməklə məhdudlaşmır: “Siyasət əslində dünyanı oxumaq və hadisələrin mahiyyətini anlamaq sənətidir. Gənclər bu sahəyə maraq göstərmək üçün ilk növbədə ‘siyasət kirlidir’ və ya ‘siyasət sıxıcıdır’ kimi stereotiplərdən uzaqlaşmalıdırlar.”
Onun sözlərinə görə, bu sahədə biliklərin artırılması üçün mütaliə mühüm rol oynayır: “Siyasət bir cəmiyyətin taleyini müəyyən edən ən böyük intellektual fəaliyyətlərdən biridir. Bu sahədə özünü inkişaf etdirmək istəyən gənclər mütləq şəkildə geniş mütaliə etməlidir.”
Deputat qeyd edib ki, dünya siyasətini öyrənmək gənclərə daha geniş baxış bucağı qazandırır: “Qlobal prosesləri izləyən və analiz edən gənc anlayır ki, uzaq ölkələrdə baş verən hadisələr belə onun gündəlik həyatına təsir edir.”
Mütəxəssis vurğulayıb ki, siyasət sahəsində oxu vərdişi gənclərdə tənqidi düşüncəni formalaşdırır: “Mütaliə edən gənclər informasiyanı daha düzgün analiz edir, emosional yanaşmadan uzaqlaşaraq rasional qərarlar verməyi öyrənir.”
Deputat əlavə edib ki, klassik və müasir siyasi ədəbiyyatın öyrənilməsi gənclərin inkişafında mühüm rol oynayır: “Bu proses gənclərin yalnız vətəndaş kimi deyil, eyni zamanda strateji düşünə bilən fərd kimi formalaşmasına şərait yaradır.”
Sonda deputat bildirib ki, siyasətə marağın artması üçün əsas şərt onu dərindən anlamaqdır: “Dünyanı dəyişmək istəyən gənclər üçün ən güclü vasitə emosional reaksiyalar deyil, bilikdir. Siyasəti sevmək üçün onu anlamaq, anlamaq üçün isə oxumaq vacibdir.”