Bu sual bir müzakirə olunan mövzulardan biridir və görürsünüz ki, hər kəsin özünəxas cavabları var, ancaq bir mənalı cavab yoxdur. Ümum olaraq yanaşılacaq ki, keçmiş nəsillərlə müqayisədə bu günkü şagirdləri daha dırnaqarası desək, zəif kimi qiymətləndirmək doğru yanaşma sayılmaz.
Bu sözləri “Tehsil365” ə açıqlamasında , psixoloq Nabat Mirzəyeva bildirib.
“Daha real bir yanaşma odur ki, bu günkü şagirdlər psixoloji baxımından əvvəlki şagirdlərə nisbətən daha açıq və öz emosiyalarını daha rahat bir şəkildə ifadə etməyə meyillidirlər və çalışırlar. Çünki əvvəlki nəsillərdə emosiyalarını açıq şəkildə ifadə etməklə bağlı çətinliklər olurdu, özlərinin iradəsiz və özgüvənsiz hiss edirdilər bu baxımdan. Əvvəlki nəsillərdə emosiyalarını açıq şəkildə ifadə etmək çox zaman zəiflik kimi qəbul olunurdu. Yəni, güclü görünmək daha çox istənilirdi, emosiyalarını bildirməmək daha çox təşviq edilirdi və bir növ öz daxili dünyamızda gizlin yaşayırdıqdır çox emosiyalarımızı.”
“Uşaqlar və gənclər hisslərini gizlətməyə və problemlərini paylaşmamağa daha çox təşviq edilərdi. Uşaqlarla gənclərə sus, sakit dur, dayan, gözlə, hələ demə, lazım deyil, ehtiyac yoxdur, sən qarışma deyərək problemlərini gizlətməyi və hisslərini gizlətməyi daha çox üstün tutulurdu. Bu deməkdir ki, onlar güclü görünmək məcburiyyətində qalırdı və psixoloji çətinliklər daha az görünən və daha çox daxildə yaşanan olurdu.”
“Hal-hazırda ki, şagirdlər isə informasiya bolluğu, sosial media və psixoloji maarifləndirmənin artması səbəbi ilə sosial ünsiyyətləri daha rahat şəkildə ifadə edə bilirlər. Onlar narahatlıqı, stressi və digər emosional vəziyyətlər haqqında danışmağı rahat şəkildə qəbul edirlər və bu onlar üçün zəiflik hesab olunmur. Əksinə, bu, psixoloji şüurun artmasının göstəricisidir və onlar özlərini daha rahat hiss edirlər.”
“Digər tərəfdən isə müasir dövrün özünə məxsus çətinliklər də var ki, rəqabət, akademik olaraq təzyiqlər, sosial müqayisə və texnologiyanın təsiri bəzən şagirdlərin stres səviyyəsini artırır və bu baxımdan onlar daha çox dəstəyə ehtiyac duyması normaldır.”
Psixoloq bildirir ki, “Nəhayət olaraq demək olar ki, bugünkü şagirdlər daha zəif deyil, sadəcə daha özgüvənli, daha iradəli, daha şüurlu, daha açıq və psixoloji vəziyyətlərini ifadə etməyə daha meyillidirlər. Bu isə sağlam cəmiyyət qurmaq üçün müsbət bir inkişaf kimi qiymətləndirilməlidir.”