Azərbaycanlı tələbə dünyanın ən nüfuzlu universitetlərindən birinə qəbul olub.
“Tehsil365“ xəbər verir ki, Azərbaycan Respublikası Prezidenti yanında Dövlət İdarəçilik Akademiyasının 1-ci kurs tələbəsi, "Zəkalar" liseyinin məzunu Elcan Əsədli ABŞ-nin aparıcı ali təhsil müəssisələrindən olan Kaliforniya Universitetinin Berkli kampusuna (University of California, Berkeley) qəbul alıb.
O, universitetin “Siyasi elmlər” ixtisası üzrə bakalavr pilləsinə qəbul olunan ilk azərbaycanlı kimi tarixə düşüb.
Dünyanın ən nüfuzlu ali təhsil müəssisələrindən biri olan bu universitet “Public University” kateqoriyası üzrə 1-ci yerdə qərarlaşır və qlobal reytinqlərdə TOP10-luqda yer alır.
Qeyd edək ki, Elcan Əsədli dövlət məktəbi məzunu olaraq bu nəticəni əldə edən cəmi iki nəfərdən biri olub.
O, bundan əvvəl cari ildə Harvard Universitetinin yay məktəbinə qəbul olan yeganə azərbaycanlı olub. Elcan Əsədli eyni zamanda digər nüfuzlu ali məktəblərdən də qəbul təklifi alıb, bəzi müraciətlərinin nəticələri isə hələlik gözlənilir.