Azərbaycan ədəbiyyatının tanınmış nümayəndələrindən biri olan Teymur Elçinin yaradıcılığı və ictimai fəaliyyəti bu gün də diqqət mərkəzindədir.
“Tehsil365” xəbər verir ki, 28 mart 1924-cü ildə Şuşa şəhərində anadan olan şair ömrünün sonuna qədər ədəbi və ictimai sahədə fəal olmuş, 1992-ci ildə Bakıda vəfat etmişdir.
Teymur Elçin şair və publisist kimi Azərbaycan ədəbiyyatına mühüm töhfələr vermişdir. O, 1958-ci ildən Azərbaycan Yazıçılar Birliyinin, eyni zamanda Azərbaycan Jurnalistlər Birliyinin üzvü olmuşdur. Yaradıcılığı yüksək qiymətləndirilən şair 1991-ci ildə Azərbaycan Dövlət mükafatına layiq görülmüşdür.
Onun fəaliyyəti yalnız ədəbiyyatla məhdudlaşmamış, dövlət idarəçiliyində də mühüm vəzifələrdə çalışmışdır. Belə ki, o, 1975–1988-ci illərdə Azərbaycan SSR mədəniyyət nazirinin müavini vəzifəsində çalışaraq ölkənin mədəni həyatına töhfələr vermişdir.
Teymur Elçinin zəngin yaradıcılığı və çoxşaxəli fəaliyyəti Azərbaycan ədəbiyyatı və mədəniyyət tarixində özünəməxsus yer tutur və bu gün də hörmətlə xatırlanır.