Onun sözlərinə görə, bu təsirin dərəcəsi insandan insana dəyişir və əsasən izləmə tezliyi, izlənilən vaxt, şəxsin psixoloji dayanıqlılığı və xarakter xüsusiyyətləri ilə bağlıdır.
Psixoloq Nabat Mirzəyeva “Tehsil365”ə açıqlamasında bildirib ki, qorxu və psixoloji gərginlik yaradan filmlərin izlənməsi insan psixologiyasına həm qısa, həm də uzunmüddətli təsirlər göstərə bilər.
O deyib ki, “qısa müddətli təsirlər arasında gərginlik, qorxu hissi, ürək döyüntülərinin artması, yuxu pozuntuları və kabuslar ola bilər. Xüsusilə gecə saatlarında izlənən qorxu filmləri beyində təhlükə siqnallarını aktivləşdirir və rahat yuxuya getməyi çətinləşdirir. Bu, bəzən insanlarda narahatlıq və daimi gərginlik hissi yaradır.”
Mirzəyeva əlavə edib ki, “uzun müddətli təsirlər daha ciddi psixoloji nəticələrə səbəb ola bilər. Daimi olaraq qorxu filmlərinə baxan insan real həyatda təhlükə olmayan vəziyyətləri belə riskli kimi qavramağa başlayır. Bu, narahatlıq səviyyəsinin artmasına, fobiyaların formalaşmasına və zorakılıqla qarşılaşma qorxusunun daimi hissinə gətirib çıxara bilər.”
Psixoloq vurğulayıb ki, bəzi insanlar üçün qorxu filmləri müvəqqəti emosional boşalma və adrenalin hissi yaradır. Onun sözlərinə görə, “psixoloji dayanıqlı fərdlər bu filmləri izləyərkən təhlükəsiz mühitdə qorxu hissini yaşayır, emosional boşalma əldə edir və bu, onlarda narahatlıq yaratmır. Amma psixoloji olaraq həssas insanlarda bu, uzunmüddətli gərginlik və narahatlığa səbəb ola bilər.”
Nabat Mirzəyeva nəticə olaraq qeyd edib ki, “qorxu filmlərinin təsiri izləmə tezliyi və şəraitdən asılıdır. Əgər bu filmlər uzun müddətli narahatlıq, yuxu problemi və gündəlik həyatda gərginlik yaradırsa, izləmə tezliyini azaltmaq lazımdır. Daha balanslı seçimlər etmək və psixologiyamıza sağlam təsir göstərən filmlərə üstünlük vermək vacibdir.”