Böyük Britaniya hökuməti süni intellekti (AI) elmi tədqiqatlarda strateji vasitə kimi geniş tətbiq etməyi planlaşdırır. Bu istiqamətdə ölkənin ən böyük dövlət tədqiqat maliyyələşdiricisi olan UK Research and Innovation birinci dəfə qəbul edilmiş AI strategiyası çərçivəsində ölkənin kəsfiyyat sahəsində qabaqcıl mövqeyini qorumağı hədəfləyir.
“Tehsil365” xarici KİV-ə istinadən xəbər verir ki, yeni strategiya 19 fevral 2026‑cı ildə açıqlanıb və sənədə əsasən süni intellekt texnologiyaları səhiyyədən təmiz energetikaya, təhsildən ictimai xidmətlərə qədər müxtəlif sahələrdə elmi kəşfləri sürətləndirmək üçün istifadə olunacaq.
Hökumət planlaşdırır ki, AI tədqiqatların aparılmasında transformasiyaedici təsir göstərsin və bu texnologiya nəticəsində innovasiyaların geniş tətbiqi reallaşsın, məsələn, yeni tibbi müalicələr, daha effektiv ictimai xidmətlər və qabaqcıl məhsulların yaranması.
Strategiyanın əsas məqamlarından biri də AI sahəsinə rekord həcmli - £1,6 milyard investisiya ayrılmasıdır ki, bu da bu sahənin inkişafını təmin etmək üçün nəzərdə tutulub.
Ekspertlər hesab edirlər ki, süni intellektin elmi tədqiqatlarda istifadəsi daha sürətli elmi nəticələr əldə etməyə kömək edəcək və Böyük Britaniyanı bu sahədə qlobal liderlər sırasına daxil edə bilər. Bununla yanaşı, süni intellekt texnologiyalarının tədqiqi sahəsində yeni laboratoriyaların yaradılması və tədqiqatçılara geniş resursların ayrılması planlaşdırılır ki, bu da gələcək elmi kəşflərə töhfə verəcək.
Bu addımlar süni intellekti yalnız tətbiqi texnologiya kimi deyil, elmi innovasiyaları sürətləndirən mühüm vasitə kimi gündəmin mərkəzinə gətirir, eyni zamanda Böyük Britaniyanın elmi və texnoloji sahədə rəqabət qabiliyyətini artırmağı hədəfləyir.