Dermatoloq Bəxtiyar Paşayev bildirib ki, dəri ilə bağlı problemlərdə gözləmək doğru deyil və dəyişiklik hiss edilən kimi mütəxəssisə müraciət olunmalıdır.
Onun '“Tehsil365”ə açıqlamasına görə, dəridə, eləcə də dırnaqlarda və saçlarda yaranan istənilən problem diqqətlə izlənilməli və vaxtında həkimə göstərilməlidir:
“Dərimizdə hər hansı bir problem görən kimi mütləq şəkildə dermatoloqa müraciət etmək lazımdır. Bu, yalnız dəridə deyil, həm də dəri artımlarında – dırnaqlarda və saçlarda yaranan dəyişikliklərə də aiddir”.
Dermatoloq qeyd edib ki, dəri insan orqanizminin ən böyük orqanıdır və onun sahəsi təxminən iki kvadrat metr təşkil edir:
“Dəri 35 trilyonlarla hüceyrədən ibarət olan bioloji sistemin bir hissəsidir və orqanizmdə baş verən dəyişikliklər, pozulmalar və ya xəstəliklər ilk növbədə məhz dəridə öz əksini tapır”.
Mütəxəssis vurğulayıb ki, bu səbəbdən dəridə müşahidə edilən istənilən fərqli əlamət vaxtında qiymətləndirilməlidir:
“Ona görə də dəridə gördüyümüz hər hansı dəyişiklik zamanı gecikmədən dermatoloqa müraciət etmək vacibdir”.