“Öndə Gənclər” (Öndə) İctimai Birliyi “LeadCraft – tarixi nümunələr üzərindən liderlik sənəti” layihəsi üzrə Ağdaşda növbəti seminarını təşkil edib. Seminar Ağdaş şəhər M.Şeyxzadə adına internat tipli THT fənləri təmayüllü Gimnaziyanın dəstəyi ilə keçirilib. Seminarda gimnaziyanın 30 nəfər gənc şagirdi iştirak edib.
“Tehsil365” xəbər verir ki, layihənin eksperti, Dilguşə Sadıqova qeyd edib ki, “Liderlik çox vaxt “rəhbərlik etmək” kimi qəbul olunur, amma əslində liderlik gündəlik seçimlərdə başlayır: düzgün qərar vermək, ünsiyyəti qurmaq, komandada işləmək və məsuliyyəti üzərinə götürmək. Yumşaq bacarıqlar gənclərin həm məktəb həyatında, həm də gələcək planlarında daha inamlı addım atmasına kömək edir.”
Seminar zamanı iştirakçılar “lider” anlayışını öz baxış bucaqlarından təsvir edib, daha sonra liderliyin mahiyyəti birgə müzakirə olunub və praktik oyunlarla yoxlanılıb. Seminarın ikinci modulunda iştirakçılar komandalara bölünüb, tarixdə baş vermiş real hadisələr əsasında hazırlanmış tapşırıqları təhlil ediblər. Bu hissədə Ulu Öndər Heydər Əliyev və Prezident İlham Əliyevin liderlik addımları və qərarları üzərindən müzakirələr aparılıb, mövzu üzrə faydalı nəticələr çıxarılıb.
“LeadCraft” layihəsi Azərbaycan Respublikasının Gənclər Fondunun maliyyə dəstəyi ilə həyata keçirilir. Azərbaycan Respublikası Gənclər Təşkilatı Milli Şurası (NAYORA) və Gənclərin İnkişaf və Karyera Mərkəzinin (GİKM) tərəfdaşlığı ilə icra olunur. Layihə Ağdaş ilə yanaşı Şəki, Zaqatala və Balakən rayonlarını da əhatə edir. Yeniliklər Öndə-nin rəsmi Instaqram səhifəsində (@ondegencler) paylaşılacaq.
