Onun sözlərinə görə, “robotlaşdırma bir tərəfdən xətasız istehsalat və resurs bolluğu sayəsində qlobal yoxsulluğun texniki həllini təmin edə bilər. İnsanlar ağır fiziki və rutin zehni əməkdən azad olaraq vaxtlarını elmi kəşflərə, incəsənətə və yaradıcılığa yönəldə bilərlər. Bu, sivilizasiyanın ‘yaşamaq üçün çalışan’ modelindən ‘yaratmaq üçün yaşayan’ modelinə keçididir.”
Kibertəhlükəsizlik üzrə mütəxəssis Elvin Abbasov “Tehsil365“ə açıqlamasında bildirib ki, bütün sahələrin tamamilə robotlaşdırılması bəşəriyyət üçün həm böyük imkanlar, həm də ciddi risklər yaradır.
Mütəxəssis xəbərdarlıq edib ki, bu texnoloji sıçrayış eyni zamanda insanların öz faydalılıq hissini itirməsinə, kütləvi məqsədsizliyə və psixoloji böhranlara yol aça bilər. Abbasov əlavə edib: “Hər bir prosesin alqoritmlərə həvalə edilməsi bəşəriyyətin həm fiziki, həm də intellektual tənəzzülü, yəni kritik vəziyyətlərdə qərarvermə qabiliyyətinin körləşməsi riskini yaradır.”
Elvin Abbasov vurğulayıb ki, texnoloji resurslar üzərində nəzarət yalnız kiçik bir qrupun əlində cəmləşərsə, rəqəmsal bərabərsizlik dərinləşəcək və cəmiyyətin böyük hissəsi tamamilə əhəmiyyətsizləşə bilər. Onun fikrincə, robotların hakim olduğu bir gələcəkdə “Universal Baza Gəliri” kimi yeni sosial müqavilələr və rəqəmsal etika normaları informasiya təhlükəsizliyi qədər vacib müdafiə xəttinə çevrilməlidir.