Lakin ünsiyyət dərinləşdikcə bəzi xarakterik davranışlar daha aydın şəkildə özünü göstərir.
Psixoloq Mətanət Əliyeva ”Tehsil365”ə açıqlamasında bildirib ki, narsistik xüsusiyyətlərə malik insanlar ilk baxışdan çox vaxt özünə güvənli, cəlbedici və diqqət mərkəzində olmağı sevən biri kimi görünə bilirlər.
Onun sözlərinə görə, belə şəxslər adətən özlərini digərlərindən üstün görmək meyli nümayiş etdirir, tez-tez öz nailiyyətlərini vurğulayır və xüsusi münasibət gözləyirlər: “Onlar diqqət və tərifə ehtiyac duyur, tənqidə qarşı həssas olurlar və ən kiçik iradı belə şəxsi hücum kimi qəbul edə bilərlər.”
Əliyeva əlavə edib ki, empatiya səviyyəsinin zəif olması da diqqət çəkən xüsusiyyətlərdəndir: “Bu insanlar qarşı tərəfin hisslərini anlamaqda çətinlik yaşayır, münasibətlərdə isə daha çox öz ehtiyac və istəklərini ön plana çəkirlər. Bəzən digər insanlardan istifadə etməyə meylli davranışlar sərgiləyə bilirlər.”
Psixoloq vurğulayıb ki, ilk təəssüratda həddindən artıq ideal görünmək, özünü “ən yaxşı”, “ən fərqli” kimi təqdim etmək, tez yaxınlıq qurub daha sonra münasibətdə balansı pozmaq halları da müşahidə oluna bilər.
Mətanət Əliyeva qeyd edib: “Bu xüsusiyyətlərin bir neçəsinin olması insanın mütləq narsistik şəxsiyyət pozuntusuna sahib olduğu anlamına gəlmir. Bu, daha çox davamlı və sabit davranış nümunəsi olduqda mütəxəssis tərəfindən qiymətləndirilməlidir.”