Bakı Dövlət Universitetinin (BDU) Biologiya fakültəsində “Ətirli yovşan (Artemisia lerchiana Web.) bitkisi vasitəsilə alınan metal nanohissəciklərin fiziki-kimyəvi xüsusiyyətlərinin tədqiqi” mövzusunda elmi seminar keçirilib.
Bu barədə “Tehsil365” ə BDU-dan məlumat verilib.
Elmi seminarda Biofizika və biokimya kafedrasının doktorantı Günay Həsənova mövzu ilə bağlı məruzə edib. Məruzədə bildirilib ki, tədqiqat çərçivəsində ətrili yovşan bitkisinin ekstraktı vasitəsilə gümüş və sink nanohissəcikləri ekoloji cəhətdən təhlükəsiz yaşıl sintez üsulu ilə əldə olunub və onların fiziki-kimyəvi xüsusiyyətləri kompleks şəkildə öyrənilib. Tədqiqatın əsas məqsədi sintez olunmuş nanomaterialların struktur, optik, morfoloji və elektrokimyəvi xüsusiyyətlərini müəyyən etməkdir.
Təqdim olunan nəticələr göstərib ki, sintez olunmuş nanohissəciklər nanoölçülü diapazonda formalaşıb və stabil fiziki-kimyəvi xüsusiyyətlərə malikdir. Elektrokimyəvi analizlər əldə olunan materialların yüksək aktivliyə və aşağı daxili müqavimətə malik olduğunu göstərir. Bu isə həmin nanomaterialların enerji saxlama sistemləri, sensor texnologiyaları və katalitik proseslər kimi müxtəlif sahələrdə tətbiq potensialını artırır.
Vurğulanıb ki, tədqiqatın nəticələri yaşıl sintez metodunun ekoloji baxımdan təhlükəsiz, səmərəli və perspektivli nanomaterialların əldə olunması üçün mühüm yanaşma olduğunu təsdiqləyir. Seminarda yaşıl nanobiotexnologiya, ekoloji təhlükəsiz sintez üsulları və nanomaterialların tətbiq imkanları ətrafında geniş müzakirələr aparılıb.