Bakı Dövlət Universitetinin (BDU) və Türkiyənin Bartın Universitetinin İnformasiya və sənəd menecmenti fakültələrinin birgə təşkilatçılığı ilə qardaş ölkədə keçirilən 62-ci “Kitabxana həftəsi” tədbirləri çərçivəsində “Sərhədləri aşan bilik: Azərbaycanda informasiya və sənəd menecmenti” mövzusunda panel təşkil olunub.
Bu barədə “Tehsil365"ə BDU-dan məlumat verilib.
Tədbirin moderatoru – Bartın Universitetinin İnformasiya və sənəd menecmenti fakültəsinin dekanı dosent Ahmet Altay vurğulayıb ki, Türkiyədə 1964-cü ildən başlayaraq hər il keçirilən “Kitabxana həftəsi”nin məqsədi cəmiyyətdə kitabxanaçılıq təhsilinə, kitabxana-informasiya fəaliyyətinə marağı artırmaq, bu istiqamətdə daha yaxşı nəticələr əldə etməkdir. Bu məqsədlə həftə boyu konfranslar, panellər, kitabxanalara, sərgi salonlarına və muzeylərə ekskursiyalar təşkil edilir, tanınmış ictimai xadimlərlə görüşlər keçirilir, mühazirələr, ustad dərsləri dinlənilir. BDU-nun İnformasiya və sənəd menecmenti fakültəsi də 2021-ci ildən etibarən Türkiyədə keçirilən “Kitabxana həftəsi” tədbirlərində təşkilatçı qismində fəal iştirak edir.
Sonra BDU-nun Sənəd menecmenti kafedrasının müdiri, dosent Nadir İsmayılov və Kitabxanaşünaslıq kafedrasının dosenti Pərviz Kazımi ölkəmizdəki kitabxana-informasiya mühiti, BDU-nun bu sahə üzrə kadr hazırlığında aparıcı rolu, beynəlxalq əməkdaşlıq, xüsusilə qardaş Türkiyənin ali təhsil müəssisələri ilə son illər inkişaf edən əməkdaşlıq, birgə elmi konfransların, panel və müzakirələrin, ustad dərsləri və elmi seminarların təşkili barədə geniş məlumat veriblər.
Panel çərçivəsində aparılan müzakirələr iştirakçılar tərəfindən maraqla dinlənilib, məruzəçilərə çoxsaylı suallar ünvanlanıb.