Onun sözlərinə görə, istər günvurma, istərsə də istilik vurma zamanı xarici temperaturun yüksək olduğu hallarda orqanizmdə müəyyən müddət tənzimləmə prosesi gedir: “Daxili temperaturu stabil saxlamaq məqsədilə arterial damarların genişlənməsi, suyun xaric edilməsi və bütövlükdə temperaturun azalmasına yönəlik mexanizmlər işə düşür. Lakin bir müddətdən sonra bu mexanizmlər tükənir və nəticədə bədən temperaturu yüksəlməyə başlayır.”
Tibbi ekspert Adil Qeybulla “Tehsil365“ə açıqlamasında bildirib ki, günvurma və istilik vurma hadisələri ümumilikdə orqanizmdə istilik tənzim mexanizmlərinin pozulması ilə bağlıdır.
Ekspert qeyd edib ki, günvurma zamanı ultrabənövşəyi şüaların təsiri özünü göstərir və əlavə olaraq günəş yanıqları da ola bilər. O, ilkin yardım tədbirlərinə diqqət çəkərək bildirib: “Əgər hər hansı şəxs günvurma və ya istilik vurmasına məruz qalıbsa, dərhal sərin bir yerə keçirilməli, alnına yaş dəsmal qoyulmalı, bədəni soyuq dəsmalla silinməlidir. Əsas məqsəd bədən temperaturunu endirməkdir.”
Adil Qeybulla əlavə edib ki, bu hallarda bayılma, təzyiqin düşməsi, soyuq tər basması kimi əlamətlər müşahidə oluna bilər. Onun sözlərinə görə, vəziyyət ağır olarsa, həmin şəxs mütləq yaxınlıqdakı tibb müəssisəsinə çatdırılmalı və ixtisaslaşmış tibbi yardım göstərilməlidir.