Müasir dövrdə uşaqların texnologiyadan, xüsusilə telefonlardan istifadəsi getdikcə artır. Bu isə psixoloji inkişaf baxımından müəyyən riskləri gündəmə gətirir.
Mövzu ilə bağlı psixoloq “Tehsil365"ə açıqlama verib.
Psixoloqun sözlərinə görə, telefon asılılığı uşaqlarda diqqət və konsentrasiya problemləri yarada bilər: “Uzun müddət ekran qarşısında qalmaq uşağın diqqətini zəiflədir və onun dərsə fokuslanmasını çətinləşdirir.”
Mütəxəssis qeyd edib ki, bu hal emosional inkişafa da təsir edir: “Uşaqlar real ünsiyyət əvəzinə virtual mühitə üstünlük verdikdə, empatiya və sosial bacarıqların inkişafı zəifləyə bilər.”
Psixoloq əlavə edib ki, telefon asılılığı davranış problemlərinə də səbəb ola bilər: “Uşaqlar cihazlardan uzaq qaldıqda aqressiv və narahat davranışlar göstərə bilər.”
Onun sözlərinə görə, bu problemin qarşısını almaq üçün balans vacibdir: “Valideynlər uşaqların ekran vaxtını nəzarətdə saxlamalı, alternativ fəaliyyətlərə yönləndirməlidirlər.”
Sonda mütəxəssis bildirib ki, texnologiyadan düzgün istifadə öyrədildikdə onun mənfi təsirlərini minimuma endirmək mümkündür.