Psixoloq Nabat Mirzəyevanın sözlərinə görə, travma insan həyatında dərin iz buraxan psixoloji təcrübədir və bu təcrübə zamanla yox olmur, sadəcə formasını dəyişir. Travma dedikdə insanın yaşadığı ağrı, acı, gərginlik, qorxu və digər emosional vəziyyətlər nəzərdə tutulur.
Mütəxəssis “Tehsil365”ə açıqlamasında qeyd edir ki, travmadan sağalmaq üçün ondan qaçmaq deyil, onunla doğru şəkildə üzləşmək lazımdır. Lakin bu üzləşmə hadisəni yenidən yaşamaq və eyni ağrını təkrar hiss etmək demək deyil. Əksinə, bu proses təhlükəsiz və mərhələli şəkildə həyata keçirilməlidir.
Psixoloqun fikrincə, insan yaşadığı hadisə zamanı keçirdiyi hissləri və duyğuları analiz etməli, travmanın onun həyatına hansı təsirləri göstərdiyini anlamağa çalışmalıdır. Bu yanaşma insanın öz daxili dünyasını daha yaxşı dərk etməsinə kömək edir.
Nabat Mirzəyeva vurğulayır ki, bu prosesi mütəxəssis dəstəyi ilə həyata keçirmək daha sağlam və effektivdir. Peşəkar yanaşma sayəsində insan yaşadığı hadisəyə yeni baxış bucağı qazanır, emosiyalarını düzgün şəkildə emal edir və travmanın həyatına təsiri tədricən azalır.
Onun sözlərinə görə, psixoloji sağalma sadəcə baş verənləri xatırlamaq deyil, onları analiz etmək və dərk etməkdir. İnsan yaşadığı hadisəni həyat hekayəsinin bir hissəsi kimi qəbul etdikcə daxili gərginlik azalır və psixoloji dayanıqlıq artır.
Psixoloq əlavə edir ki, insan keçdiyi çətinliklərə fərqli prizmadan baxmalıdır: “Bu hadisə mənə nə öyrətdi?”, “Məni necə dəyişdirdi?”, “Keçmişdəki mənlə indiki mən arasında hansı fərqlər var?” kimi suallar şəxsi inkişaf üçün vacibdir.
Sonda mütəxəssis bildirir ki, travmanı tam unutmağa çalışmaq əvəzinə onu düzgün anlamaq və emal etmək daha effektiv yanaşmadır. Bu prosesdə imkan olduqca peşəkar dəstək almaq, mümkün olmadıqda isə öz duyğularını analiz etmək, özünə dəyər vermək və yaşadıqlarını həyatın bir hissəsi kimi qəbul etmək vacibdir.