Azərbaycan Respublikasının Dövlət Reklam Agentliyində İdarə Heyəti sədrinin müşaviri Elmar Abasovun rəhbərliyi və Agentliyin aidiyyəti struktur bölmələrinin rəhbərlərinin iştirakı ilə Azərbaycanda fəaliyyət göstərən iri ticarət şəbəkələrini birləşdirən Ticarət Şəbəkələrinin İnkişafı İctimai Birliyinin sədri Araz İmanov və birliyin üzvləri ilə görüş keçirilib.
Agentlikdən “Tehsil365"ə bildirilib ki, görüş çərçivəsində ölkədə açıq məkanda reklam fəaliyyətinin tənzimlənməsi sahəsində həyata keçirilən islahatlar, şəffaflığın artırılması istiqamətində görülən tədbirlər, o cümlədən "360 dərəcədə təsbit" texnologiyası ilə açıq məkandakı reklamların ölçülərinin, növünün və zonasının avtomatik sistemə ötürülməsi və açıq məkandakı reklamların müasir tələblərə uyğun təşkili məsələləri barədə ətraflı məlumat verilib.
Eyni zamanda, paytaxt və regionlardakı açıq məkandakı reklamların estetik vizual mühitinin formalaşdırılması, ümumi görünüşünün yaxşılaşdırılması məqsədilə icra olunan layihələr diqqətə çatdırılıb. Bildirilib ki, açıq məkandakı reklamların yerləşdirilməsi sahəsində innovativ yanaşmaların tətbiqi, müasir reklam daşıyıcılarının quraşdırılması və vahid standartların formalaşdırılması istiqamətində işlər davam etdirilir. Bu istiqamətdə həyata keçirilən tədbirlərin əsas məqsədi reklam fəaliyyətinin səmərəliliyinin artırılması ilə yanaşı, sahibkarlıq subyektləri üçün daha əlverişli mühitin təmin olunmasıdır.
Görüş zamanı ictimai birlik üzvləri tərəfindən açıq məkanda reklamların yerləşdirilməsi ilə bağlı mövcud çətinliklər, o cümlədən icazə prosedurları, texniki tələblər və praktiki tətbiq zamanı yaranan məsələlər diqqətə çatdırılıb, qarşılıqlı fikir mübadiləsi aparılıb.
Tərəflər dövlət qurumları ilə sahibkarlar arasında qarşılıqlı əməkdaşlığın gücləndirilməsinin vacibliyini vurğulayıb, bu istiqamətdə institusional dialoqun genişləndirilməsinin əhəmiyyətini qeyd ediblər. Gələcək əməkdaşlığın inkişaf etdirilməsi və qarşılıqlı fəaliyyət mexanizmlərinin gücləndirilməsi məqsədilə memorandumun imzalanmasının mümkünlüyü də diqqətə çatdırılıb.
