Aprelin 2-də AMEA Memarlıq və İncəsənət İnstitutu “Sənətşünaslıqda rəqəmsallaşdırma və süni intellekt” mövzusunda dəyirmi masa keçirib.
“Tehsil365“ xəbər verir ki ,bu barədə AMEA-dan məlumat verilib.
İnstitutun direktoru AMEA-nın müxbir üzvü, professor Ərtegin Salamzadə çıxışında Prezident İlham Əliyevin 2018-ci il 9 aprel tarixli Sərəncamı ilə Azərbaycanda Elm Gününün təsis edildiyini diqqətə çatdırıb. Professor bu əlamətdar günün ölkəmizdə geniş qeyd olunduğunu söyləyib. Direktor türk xalqlarının mədəniyyətinin sistemli şəkildə araşdırılması, təhlili və təsnifatının aparılması, habelə onların sənət tarixinin dövrləşdirilməsi problemlərinin nəzəri və metodoloji əsaslarının hazırlanması məqsədilə AMEA Rəyasət Heyətinin qərarı ilə Memarlıq və İncəsənət İnstitutunda Türk sənət tarixi və mədəni irsi şöbəsinin yaradıldığını bildirib.
Alim qeyd edib ki, türk mədəniyyəti və sənəti hər zaman aktuallıq kəsb etsə də, müasir dövrün çağırışları yeni istiqamətlərə üz tutmağı zəruri edir. Bu baxımdan cari ildə rəqəmsallaşdırma və süni intellekt problemlərinə üstünlük verilib. Digər sahələrdə olduğu kimi, incəsənətdə də süni intellekt yaradıcılıq prosesinin transformasiyasına, yeni ifadə formalarının yaranmasına və sənət anlayışının yenidən dəyərləndirilməsinə şərait yaradır. Süni intellektin incəsənətin müxtəlif sahələrinə təsiri isə fərqli aspektlərdə özünü büruzə verir və bu da mövzunun elmi baxımdan sistemli şəkildə araşdırılmasını zəruri edir.
Daha sonra institutun Türk sənəti tarixi və mədəni irsi şöbəsinin baş elmi işçisi professor Rəna Abdullayeva “Süni intellekt, informasiya mədəniyyəti və sənətşünaslıq” mövzusunda məruzə ilə çıxış edib. Professor qeyd edib ki, “informasiya cəmiyyəti” paradiqması cəmi bir nəsil ərzində formalaşıb. Yeni cəmiyyətin, yəni “üçüncü dalğa” sivilizasiyasının əsasını informasiya nəzəriyyəsi təşkil edib. Bu nəzəriyyə çərçivəsində bütün təbii, sosial və mədəni proseslər “mənbə-mesaj-qəbul edən” sxemi üzrə kommunikasiya aktı kimi nəzərdən keçirilir. İnformasiya nəzəriyyəsi informasiyanın yaranma proseslərini, siqnalların ötürülmə mexanizmlərini, kommunikativ mesajların qavranılması və onlara reaksiya verilmə xarakterini təsvir və izah edir. Buna görə də o, idarəetmə, iqtisadiyyat, hərbi sahə, humanitar və dəqiq elmlər, təhsil, mədəniyyət, incəsənət və media sahələrində praktik tətbiq oluna bilən universal nəzəriyyə kimi qəbul edilir.
Tədbirdə “İncəsənətdə süni intellektin tətbiqi problemləri”, “Qobustan Milli Tarixi-Bədii Qoruğunda rəqəmsallaşdırma və innovativ texnologiyaların muzey turizminə təsiri” və “Rəqəmsal musiqi platformaları və süni intellekt: əlçatanlıq və kəşfin yenidən formalaşması” mövzularında məruzələr dinlənilib.