Pasxa bayramı ərəfəsində Praqada 98 illik tarixi olan Çexoslovakiya Xarici Ölkələr İnstitutunun tarixi zallarında “Ana təbiətin dördüncü elementi: Novruz və Pasxa kuklaların gözü ilə” adlı sərgi keçirilib. Tədbir Praqada “Azərbaycan Mədəniyyət Evi” layihəsini həyata keçirən Çexiyanın “Natəvan” cəmiyyəti tərəfindən ölkəmizin Çexiyadakı səfirliyinin dəstəyi ilə təşkil olunub.
“Tehsil365" xəbər verir ki, sərginin təşəbbüskarı və konsepsiya müəllifi Azərbaycan, Çexiya və Slovakiya Yazıçılar birliklərinin üzvü, Praqada “Azərbaycan Mədəniyyət Evi” layihəsinin direktoru, şair və dramaturq Leyla Bəyim olub. O, həm də sərginin kuratorudur.
Sərgidə Azərbaycan Rəssamlar İttifaqının üzvü, azərbaycanlı rəssam Vəfa Aşumova və Praqa Kukla Klubunun prezidenti Monika Jilkovanın əsərləri bir araya gətirilib. Nümayiş olunan sənət kuklaları təbiətin dörd elementini - su, külək, od və torpağı təcəssüm etdirir, yenilənmə və yenidən doğuşun universal təsvirlərini simvolizə edir.
Sərginin daha bir mühüm xüsusiyyəti “canlanan” kuklaların Azərbaycan və Çexiya Respublikasında baharın gəlişini qeyd etmək ənənələri arasındakı oxşarlıqlardan bəhs etdiyi yeddidəqiqəlik animasiya olub. Ssenari Leyla Bəyim tərəfindən qələmə alınıb. Quruluş isə Azərbaycan aktyoru və rejissoru Maqsud Məmmədova məxsusdur. O, layihəni süni intellekt texnologiyasından istifadə edərək həyata keçirib.
Sərgini Çexoslovakiya Xarici Ölkələr İnstitutunun sədri Hana Hlavaçkova açıb. O, qonaqları salamlayıb, qurumun tarixi və fəaliyyəti haqqında danışıb.
Leyla Bəyim çıxışında iki xalqın bahar ayinləri arasındakı mədəni oxşarlıqları vurğulayıb: “Bəzən ənənələr hətta zahirən də üst-üstə düşür: “səməni” və “osenya” çiçəklərinin becərilməsi, tonqal ətrafında keçirilən ayinlər mahiyyət etibarilə eyni mənanı daşıyır - təmizlənmə, yenilənmə və təbiətin həyat mənbəyi kimi qəbul edilməsi”.
Bədii kukla ustaları Vəfa Aşumova və Monika Jilkova qonaqlara yaradıcılıq yolları və əsərlərinin yaradılmasının xüsusiyyətləri barədə danışıblar.
Animasiya nümayişi və sərgi ilə tanışlıqdan sonra qonaqlar ənənəvi Novruz və Pasxa şirniyyatları süfrəsi ətrafında qeyri-rəsmi söhbətlərini davam etdiriblər.
Azərbaycanın Çexiyadakı səfiri Yaşar Əliyevin dəvəti ilə Vatikan və Qazaxıstan səfirləri, Türkiyə səfirliyinin, Çexiya Mədəniyyət Nazirliyinin, Xarici İşlər Nazirliyinin və digər dövlət qurumlarının nümayəndələri, eləcə də çex ziyalıları və Azərbaycan diasporunun nümayəndələri sərgiyə qatılıblar.