Yazıçılığın mahiyyəti ilə bağlı müzakirələr hər zaman aktual olub. Bu sahənin istedad, yoxsa öyrənilə bilən bacarıq olması məsələsi isə tez-tez müzakirə olunan mövzulardandır.
Mövzu ilə bağlı yazar İradə Aytel “Tehsil365"ə açıqlama verib.
Yazar bildirib ki, yazıçılıq yalnız istedadla məhdudlaşmır: “Servantesin məşhur fikri – ‘Yazıçı yaşıyla yox, başıyla yaradır’ – bu sahənin mahiyyətini açır. Bu yanaşma göstərir ki, yazıçını formalaşdıran əsas amillərdən biri onun intellektual zənginliyi və düşüncə dərinliyidir.”
Onun sözlərinə görə, mütaliə yazıçının inkişafında mühüm rol oynayır: “Oxumayan istedad sahibinin yazması mümkündür, lakin onun yaratdığı mətnlər dərinlik və çoxqatlılıq baxımından zəif olur. Mütaliə yazıçı üçün həm dil materialı, həm də düşüncə modeli yaradır.”
Yazar qeyd edib ki, müşahidə qabiliyyəti də yazıçının əsas xüsusiyyətlərindəndir: “Hər kəs baxa bilər, amma hər kəs görə bilmir. Yazıçı adi insanın diqqət etmədiyi detalları görməyi bacarmalıdır. Bu bacarıq qismən istedadla bağlı olsa da, zamanla inkişaf etdirilə bilər.”
Onun fikrincə, yazıçı çoxşaxəli düşünmə qabiliyyətinə malik olmalıdır: “Yazıçı bir qədər rəssam, bir qədər mühəndis, bir qədər həkim və hətta bir qədər hakimdir. O, həm təsvir edir, həm qurur, həm analiz edir, həm də qərar verir.”
Yazar vurğulayıb ki, inandırıcılıq ədəbiyyatın əsas şərtlərindən biridir: “Müəllif yazdığı mövzunu bilmədikdə mətn öz təsirini itirir. Buna görə də yazıçı müxtəlif sahələr üzrə biliklərə malik olmalı və daim özünü inkişaf etdirməlidir.”
Sonda o qeyd edib ki, yazıçılıq həm istedad, həm də öyrənilə bilən bacarıqdır: “İstedad başlanğıcdır, lakin kifayət etmir. Yazı texnikası, üslub, kompozisiya və davamlı təcrübə bu sahədə uğurun əsas şərtləridir. Yazıçı olmaq istəyən hər kəs üçün əsas yol aydındır: çox oxumaq, müşahidə etmək və daim yazmaq.”