Uşaqların yaradıcılıq qabiliyyətinin inkişafında incəsənətin rolu danılmazdır. Xüsusilə rəsm fəaliyyəti uşaqların həm düşüncə, həm də emosional dünyasına təsir edən əsas vasitələrdən biri hesab olunur. Bəs rəsm uşağın inkişafında nə qədər önəmlidir?
Mövzu ilə bağlı xalq rəssamı Xanlar Əhmədov “Tehsil365"ə açıqlama verib.
Rəssam bildirib ki, “Rəsm uşağın daxili dünyasının ən təbii ifadə formalarından biridir. Uşaq sözlə ifadə edə bilmədiyi hissləri rənglər və formalar vasitəsilə ortaya qoyur.”
Onun sözlərinə görə, rəsm yalnız istedad məsələsi deyil, həm də inkişaf vasitəsidir: “Rəsm çəkmək uşağın təxəyyülünü, diqqətini və müşahidə qabiliyyətini gücləndirir. Bu prosesdə uşaq sərbəst düşünməyi və fərqli yanaşmalar tapmağı öyrənir.”
Rəssam qeyd edib ki, valideynlərin yanaşması bu sahədə çox önəmlidir: “Ən böyük səhv uşağın rəsmini qiymətləndirmək və ya onu müəyyən çərçivəyə salmaqdır. Uşaq azad şəkildə yarada bilməlidir.”
O həmçinin vurğulayıb ki, rəsm emosional inkişaf üçün də vacibdir: “Bu fəaliyyət uşağın stresini azaltmağa, özünü ifadə etməsinə və daxili balansını qorumasına kömək edir.”
Sonda rəssam əlavə edib ki, “Hər uşaq rəssam olmaq məcburiyyətində deyil, amma hər uşağın yaradıcı düşünməsi üçün şərait yaradılmalıdır. Rəsm bu prosesin ən təsirli vasitələrindən biridir.”