Onun sözlərinə görə, əgər Azərbaycanda orta ümumi təhsil məktəblərində süni intellekt dərsləri tətbiq olunacaqsa, bu, yalnız dərs proqramı ilə məhdudlaşmamalıdır.
Təhsil eksperti Ramin Nurəliyev “Tehsil365”ə açıqlamasında süni intellektin tədris prosesinə daxil edilməsinin vacibliyindən danışıb.
Əsas məsələ müəllimlərin keyfiyyətli hazırlanmasıdır: “Əgər biz tədris prosesinə başlayırıqsa, məktəblərdə mütləq müəllim keyfiyyətinə diqqət yetirməliyik, müəllim sayına diqqət saxlamalıyıq və buna uyğun tədris prosesini həyata keçirməliyik. Bunun ali təhsil ayağı da var. Ali təhsil müəssisələrində süni intellekt ixtisasları mütləq açılmalıdır. Əgər biz gələcəkdə dünyanın inkişaf etmiş ölkələri ilə süni intellekt istiqamətində rəqabət aparmaq istəyiriksə, orta məktəblərdə bu dərslərin, ali məktəblərdə isə ixtisasların tətbiqi bir mənalı olaraq vacibdir.”
Ekspert süni intellektin tədris prosesində yaratdığı risklərə də diqqət çəkib. Onun sözlərinə görə, şagirdlər ev tapşırıqlarını süni intellekt vasitəsilə həll edib müəllimə təqdim edə bilərlər ki, bu da onların inkişafını zəiflədə bilər: “Şagird öz düşüncə qabiliyyətindən istifadə etmədən süni intellekt vasitəsilə tapşırığı həll edəcəksə, bu əlbəttə ki, bilik səviyyəsini aşağı salacaq. Ona görə müəllimlər və valideynlər bu məsələdə çox diqqətli olmalıdırlar. Süni intellektdən məlumat almaq olar, amma tapşırığı bütövlükdə ona həvalə etmək yol verilməzdir.”
Nurəliyev süni intellektin gələcəyin əsas açarlarından biri olduğunu vurğulayıb. Onun fikrincə, bir çox ixtisas və peşələrin süni intellektdən təsirlənməməsi mümkün deyil: “Hətta pedaqoji ixtisaslara qədər süni intellektin təsiri özünü göstərəcək. Müsbət tərəfi odur ki, süni intellektdən istifadə edərək daha geniş məlumat əldə etmək və prosesləri daha səmərəli tətbiq etmək mümkün olacaq. Mənfi tərəfi isə əmək bazarına təsirdir. İxtisasında mükəmməl olmayan mütəxəssislər ixtisara düşəcək, yalnız peşəsini yaxşı bilənlər əmək bazarında qalacaq.”
Ekspert gənclərə də tövsiyə edib ki, müasir dövrün tələblərinə uyğun ixtisaslar seçsinlər və həmin sahələrdə ən yaxşı mütəxəssis olmağa çalışsınlar: “Müasir dünya texnologiya dünyasıdır. İşə götürən üçün maraqlı olan peşəsini yaxşı bilməkdir. Peşəsini yaxşı bilən əmək bazarında qalacaq, bilməyən isə süni intellektin təsiri ilə əmək bazarından çıxarılacaq. Ona görə gənclər seçdikləri ixtisaslarda mütləq müasir dövrün tələblərinə uyğun biliklərə yiyələnməli və öz sahələrində ən yaxşı mütəxəssis olmağa çalışmalıdırlar.”