“Son dövrlərdə şagird və tələbələr arasında nevroloji mənşəli problemlərin artması müşahidə olunur”.
“Tehsil365” xəbər verir ki, nevroloq Aytən Hacıyevanın sözlərinə görə, gənclər arasında ən çox rast gəlinən hallar baş ağrıları, migren, başgicəllənmə, diqqət və yaddaş pozuntuları, eləcə də yuxu problemləridir. Bu şikayətlər xüsusilə uzun müddət telefon və kompüter istifadəsi, qeyri-düzgün yuxu rejimi və psixoloji gərginliklə əlaqələndirilir.
“Son illərdə müraciət edən gənclərdə sinir sistemi ilə bağlı funksional pozuntular daha çox qeydə alınır. Xüsusilə imtahan dövründə stress, zehni yüklənmə və fiziki hərəkətsizlik bu problemləri artırır”, – deyə nevroloq bildirib.
O, əlavə edib ki, bəzi hallarda bu simptomlar psixosomatik xarakter daşıyır və vaxtında müdaxilə edilmədikdə daha ciddi problemlərə səbəb ola bilər.
Nevroloq gənclərə gündəlik rejimə diqqət etməyi, ekran vaxtını azaltmağı, sağlam qidalanmağı və uzunmüddətli narahatlıqlar zamanı həkimə müraciət etməyi tövsiyə edir.