Cəfər Cabbarlı adına Respublika Gənclər Kitabxanasında 2016-cı ilin şanlı səhifələrindən biri olan Aprel döyüşlərinə həsr olunmuş tədbir təşkil edilib.
“Tehsil365” xəbər verir ki, əvvəlcə Ulu Öndər Heydər Əliyevin və Azərbaycanın ərazi bütövlüyü uğrunda canlarını fəda etmiş şəhidlərimizin əziz xatirəsi bir dəqiqəlik sükutla yad edilib.
Tədbiri giriş sözü ilə kitabxananın direktoru Aslan Cəfərov açaraq Aprel döyüşlərinin tarixi əhəmiyyəti haqqında danışıb. O qeyd edib ki, 2016-cı ilin aprel ayında baş verən döyüşlər Azərbaycan Ordusunun gücünü, xalqımızın birliyini və vətənpərvərlik ruhunu bütün dünyaya nümayiş etdirdi. Bildirildi ki, bu döyüşlər nəticəsində əldə olunan uğurlar sonrakı böyük zəfərin – torpaqlarımızın azad olunmasının başlanğıcı oldu.
Vurğulanıb ki, Aprel döyüşləri yalnız hərbi uğur deyil, həm də milli qürur və mənəvi üstünlük idi. Azərbaycan əsgərinin qəhrəmanlığı, şəhidlərimizin fədakarlığı hər bir gənc üçün örnəkdir və bu ruh gələcək nəsillərə ötürülməlidir.
Tədbir çərçivəsində “Vətən naminə” adlı virtual kitab sərgisinə baxış keçirilib. Sərgidə Aprel döyüşlərinə dair zəngin materiallar təqdim olunub. Burada bir sıra rəsmi sənədlərin tam mətnləri, “İlham Əliyev Cocuq Mərcanlıya həyatı qaytardı”, “Qələbənin şahidləri”, “Şahidlər və şəhidlər”, “Qaliblərin qələbəsi”, “Hay ver mənə, cənab leytenant”, “Hərbi vətənpərvərlik təbliğində Aprel döyüşlərinin rolu” kimi iyirmiyə yaxın kitabın tam mətni yer alıb.
Bununla yanaşı, sərgidə “Aprel döyüşləri – tarixi zəfərimizə gedən yolun başlanğıcıdır”, “Aprel döyüşləri – zəfərə gedən şanlı yol”, “Aprel döyüşləri – zəfər salnaməmiz”, “Tarixi qələbəmiz” kimi dövrü mətbuat nümunələri də nümayiş etdirilib.
Tədbirdə çıxış edən BDU-nun tələbələri Aprel döyüşlərinin əhəmiyyəti, Azərbaycan əsgərinin qəhrəmanlığı və gənclərin vətənpərvərlik ruhunda tərbiyəsinin vacibliyi barədə fikirlərini bölüşüblər. Onlar qeyd ediblər ki, bu cür tədbirlər gənclərin tariximizi daha dərindən öyrənməsinə və milli ruhda formalaşmasına böyük töhfə verir.
