Azərbaycan Dillər Universiteti (ADU) QS World University Rankings-in ən son nəticələrinə görə “Müasir dillər” ixtisası üzrə 151–200, “Linqvistika” sahəsində isə ilk dəfə 251–300 mövqeyinə yüksələrək beynəlxalq akademik mühitdə mövqeyini gücləndirib.
“Tehsil365” xəbər verir ki, bu barədə Elm şöbəsinin müdiri, p.f.d., dos. Sevda İmanova danışıb.
Azərbaycan Dillər Universiteti son illərdə beynəlxalq akademik sahədə mövqeyini xeyli gücləndirib və diqqətəlayiq uğurlar əldə edib. ADU-nun “Müasir dillər” ixtisası QS reytinqində 151–200, “Linqvistika” sahəsi isə ilk dəfə olaraq 251–300 mövqeyinə yüksəlib.
Elm şöbəsinin müdiri, p.f.d., dos. Sevda İmanova qeyd edib ki, bu uğurlar universitetin elmi-tədqiqat fəaliyyətinin və beynəlxalq əməkdaşlıq imkanlarının inkişafını əks etdirir. Onun sözlərinə görə, ADU əməkdaşlarının xarici universitetlərlə birgə təşkil etdiyi konfranslar, ortaq elmi nəşrlər və beynəlxalq tədbirlərdə iştirakı universitetin qlobal elmi şəbəkələrdə mövqeyini möhkəmləndirib.
ADU-da il ərzində müxtəlif istiqamətlər üzrə beynəlxalq və yerli konfranslar, elmi seminarlar və təlimlər də təşkil olunub. Bu tədbirlər tələbə və müəllim heyətinin elmi potensialının artırılmasına, yeni tədqiqat istiqamətlərinin formalaşmasına və qabaqcıl təcrübələrin paylaşılmasına imkan yaradıb.
Universitetin rektoru, akademik Kamal Abdullanın rəhbərliyi ilə həyata keçirilən strateji islahatlar və beynəlxalq əlaqələrin genişləndirilməsi ADU-nun qlobal akademik mühitdə mövqeyini daha da gücləndirib.
Dos. Sevda İmanova əlavə edib ki, əldə olunan bu nəticələr universitetin beynəlxalq standartlara uyğun inkişaf etdiyini göstərir və gələcəkdə bu göstəricilərin daha da yüksələcəyi gözlənilir.