"Artemis II" missiyasında iştirak edən dörd astronavt, "Orion" kosmik gəmisinin əsas mühərrikinin Aya doğru sonuncu itələmə qüvvəsini təmin etmək üçün işə salınmasından sonra Yer orbitini uğurla tərk edib.
“Tehsil365” Türkiyə mediasına istinadən xəbər verir ki, kosmik dildə "Aya keçid alovlanması" (TLI) adlandırılan və tam 5 dəqiqə 55 saniyə davam edən mühərrikin yandırılma prosesi problemsiz icra olunub.
NASA rəsmiləri əməliyyatın qüsursuz keçdiyini, astronavtların vəziyyətinin isə yaxşı olduğunu bildirib. Hazırda gəmi dərin kosmosa doğru irəliləyir. Təhlükəsizlik tədbiri olaraq, növbəti 36 saat ərzində hər hansı problem yaranarsa, gəmini dərhal Yerə qaytarmaq hələ də mümkündür.
Səyahətin altıncı günündə astronavtları nadir bir mənzərə gözləyir: onlar Ayın arxa tərəfindən keçərkən tam Günəş tutulmasını kosmosdan izləyəcəklər. Bu möhtəşəm anda Ay Günəşi tamamilə örtəcək, Yer kürəsi isə uzaqda kiçik bir nöqtə kimi görünəcək.
Heyətin əsas məqsədi bu sınaq uçuşunu uğurla tamamlayıb, gələcəkdə Ayın səthinə eniş üçün qapı açmaqdır.