Aprelin 3-də AMEA-nın akademik Ziya Bünyadov adına Şərqşünaslıq İnstitutunda “Elm millətin varlığının təminatçısıdır” adlı ümumi yığıncaq keçirilib. Tədbir Azərbaycanda Elm Gününə həsr edilib.
Bu barədə “Tehsil365"ə institutdan məlumat verilib.
Tədbiri açan AMEA-nın vitse-prezidenti vəzifəsini icra edən, Şərqşünaslıq İnstitutunun direktoru akademik Gövhər Baxşəliyeva diqqətə çatdırıb ki, Azərbaycan Prezidenti İlham Əliyevin 2018-ci il 9 aprel tarixli Sərəncamına əsasən təsis edilmiş Elm Gününün tarixi 1945-ci ildə Azərbaycan Elmlər Akademiyasının yarandığı günə təsadüf edir. Akademik qeyd edib ki, ölkəmizdə elmin sürətli inkişafı Azərbaycan Respublikasına rəhbərlik etdiyi həm sovet dövründə, həm də müstəqillik illərində Ümummilli Lider Heydər Əliyevin adı ilə bağlıdır. G.Baxşəliyeva Prezident İlham Əliyevin 2025-ci il noyabrın 3-də AMEA-nın 80 illik yubiley yığıncağında çıxışını xatırladaraq, dövlətimizin başçısının Ana dilimizin saflığının qorunması, elmin inkişafı və müasir tələblərə uyğunlaşması ilə bağlı səsləndirdiyi fikirlərin elmi ictimaiyyət qarşısında mühüm vəzifələr qoyduğunu deyib.
AMEA-nın nailiyyətlərindən bəhs edən akademik G.Baxşəliyeva elmimizə böyük töhfələr verən Şərqşünaslıq İnstitutunda akademik Əbdülkərim Əlizadənin mətnşünaslıq, akademik Ziya Bünyadovun mediyevistika, akademik Həmid Araslının türkologiya, professor Aida İmanquliyevanın ərəbşünaslıq, professor Rüstəm Əliyevin iranşünaslıq məktəblərinin yarandığını, bu gün institutda çalışanların əksəriyyətinin bu böyük alimlərin bilavasitə şagirdləri və davamçıları olduğunu bildirib.
Elmi işlər üzrə direktor müavini, filologiya üzrə fəlsəfə doktoru, dosent Ruhəngiz Cümşüdlü Nizami Gəncəvinin “Bağlı bir qapıya açar axtarsan, Ancaq alimlərdə axtar taparsan” beytini xatırladaraq, bununla dahi şairin elm və alimin dəyərini ən yüksək şəkildə ifadə etdiyini bildirib. Azərbaycan elminin orta əsrlərdən etibarən uzun inkişaf yolu keçdiyini söyləyən R.Cümşüdlü müasir dövrdə Azərbaycan elminin və intellektual potensialının dövlətin siyasi müstəqilliyinin və milli kimliyinin dayağı olduğunu deyib.
Daha sonra tədbirdə institutun Gənc Alim və Mütəxəssislər Şurasının sədri Nazim Mənsimov, şöbə müdirlərindən filologiya elmləri doktoru, dosent Lalə Bayramova, filologiya üzrə fəlsəfə doktoru, dosent İnci Qasımlı, rəqəmsal inkişaf və süni intellekt üzrə direktor müavini fəlsəfə üzrə fəlsəfə doktoru, dosent Elnur Mustafayev çıxış ediblər.
Çıxışlarda elmdə gənclərin rolundan, onların qarşısında duran öhdəliklərdən söz açılıb. Həmçinin Şərq xalqlarının tarixi, dili, ədəbiyyatı və mədəni irsinin öyrənilməsi istiqamətində aparılan fundamental tədqiqatlar haqqında məlumat verilib. Bununla yanaşı, əsas vəzifələrin elmi potensialı daha da gücləndirmək, innovasiyalara açıq olmaq, həmmüəllifli layihələrdə iştirak etmək və elmi nəticələri real həyata tətbiq etmək olduğu diqqətə çatdırılıb. Elmi potensialın qorunub saxlanılmasının və gənc elmi kadrların hazırlanmasının dövlətimizin diqqət mərkəzində olduğu, bu məqsədlə ölkəmizdə doktorantura təhsilinin keyfiyyətinin artırılması, gənc kadrların xaricdə təhsil alması istiqamətində böyük işlər aparıldığı vurğulanıb.