Klinik psixoloq, psixoterapevt Rövşən Nəcəfov bildirir ki, travma insan psixikasında dərin izlər buraxaraq onun düşüncə və davranış modelini əhəmiyyətli dərəcədə dəyişdirir. Onun sözlərinə görə, travma yaşamış şəxslər emosiyalarını tənzimləməkdə çətinlik çəkir, hadisələrə bəzən həddindən artıq həssas, bəzən isə qeyri-adekvat dərəcədə zəif reaksiya verə bilirlər. Bu vəziyyət onların həm özlərinə, həm də ətraf mühitə münasibətində tarazlığın pozulmasına gətirib çıxarır və nəticədə sosial münasibətlərinə, gündəlik həyat fəaliyyətinə mənfi təsir göstərir.
Mütəxəssis “Tehsil365”ə açıqlamasında vurğulayır ki, travma yalnız keçici emosional sarsıntı deyil, insanın düşüncə tərzinə, qərarvermə mexanizmlərinə və ümumi həyat keyfiyyətinə təsir edən kompleks psixoloji vəziyyətdir. Bu səbəbdən travma yaşamış şəxslərin vaxtında tibbi və psixoloji dəstək alması olduqca vacibdir. Sağlam psixoloji vəziyyət isə yalnız təhlükəsiz, anlayışlı və dəstəkləyici mühitdə formalaşa və bərpa oluna bilər.
Rövşən Nəcəfov qeyd edir ki, məsələyə yalnız fərdi deyil, həm də ictimai səviyyədə yanaşmaq lazımdır. İctimai maarifləndirmə tədbirləri vasitəsilə insanların travma haqqında məlumatlandırılması, əlamətlərin vaxtında tanınması və düzgün yanaşma üsullarının öyrədilməsi mühüm əhəmiyyət daşıyır. Bununla yanaşı, fərdi psixoloji konsultasiyaların təşkili insanların ehtiyac duyduqları dəstəyi vaxtında almasına imkan yaradır.
Mütəxəssis əlavə edir ki, travma ilə iş prosesində yalnız fərdin özü ilə deyil, əksər hallarda onun ailə üzvləri ilə də işləmək zəruridir. Çünki ailə mühiti sağalma prosesində həlledici rol oynayır. Ailə üzvlərinin düzgün məlumatlandırılması, dəstək mexanizmlərini bilməsi və empatik yanaşma nümayiş etdirməsi müalicənin effektivliyini artırır və şəxsin daha sürətli psixoloji bərpasına şərait yaradır.