Son illərdə internet və sosial media platformalarının inkişafı ilə insanlar tibbi məlumatlara daha asan çıxış əldə edir. Bir çox hallarda istifadəçilər müxtəlif simptomlarla bağlı ilk olaraq onlayn mənbələrə müraciət edir. Bəs bu məlumatlara nə qədər güvənmək olar?
Mövzu ilə bağlı tibb eksperti Rasif Bağırov “Tehsil365"ə açıqlama verib.
Tibb eksperti bildirib ki, “Onlayn tibbi məsləhətlər ümumi məlumat əldə etmək baxımından faydalı ola bilər, lakin onlar heç bir halda həkim müayinəsini əvəz edə bilməz.”
Onun sözlərinə görə, internetdə yayılan məlumatların hamısı etibarlı deyil: “Bəzi mənbələr elmi əsaslara söykənməyə bilər və yanlış yönləndirici məlumatlar verə bilər. Bu isə özünü diaqnoz etmə və yanlış müalicə riskini artırır.”
Mütəxəssis qeyd edib ki, hər bir insanın sağlamlıq vəziyyəti fərqlidir: “Eyni simptomlar fərqli xəstəliklərin əlaməti ola bilər. Bu səbəbdən fərdi yanaşma tələb olunur və bunu yalnız həkim təmin edə bilər.”
Ekspert vurğulayıb ki, onlayn məlumatlardan düzgün istifadə etmək vacibdir: “İnsanlar yalnız etibarlı tibbi platformalara müraciət etməli və əldə etdikləri məlumatları həkimlə məsləhətləşərək dəyərləndirməlidirlər.”
Sonda tibb eksperti əlavə edib ki, “Onlayn məsləhətlər ilkin məlumat üçün faydalıdır, lakin düzgün diaqnoz və müalicə üçün mütləq şəkildə peşəkar tibbi yardım vacibdir.”