Müasir təhsil sistemi ilə bağlı ən çox müzakirə olunan suallardan biri də məktəblərin əsas məqsədi ilə bağlıdır. Bəzi fikirlərə görə, məktəblər şagirdləri real həyata hazırlamalıdır, digərləri isə imtahan nəticələrinin əsas göstərici olduğunu düşünür. Bəs hazırkı sistem hansı istiqamətdədir?
Mövzu ilə bağlı təhsil eksperti “Tehsil365"ə açıqlama verib.
Ekspert bildirib ki, “Hazırkı təhsil sistemi müəyyən dərəcədə şagirdləri imtahanlara hazırlamağa fokuslanıb. Bu isə bəzən real həyat bacarıqlarının ikinci plana keçməsinə səbəb olur.”
Onun sözlərinə görə, imtahanlar bilik səviyyəsini ölçmək üçün vacib olsa da, bu kifayət deyil: “Şagird yalnız test nəticələri ilə qiymətləndirilməməlidir. Həyatda uğurlu olmaq üçün ünsiyyət, qərarvermə, problem həll etmə kimi bacarıqlar da vacibdir.”
Ekspert qeyd edib ki, bəzi məktəblərdə artıq bu istiqamətdə dəyişikliklər müşahidə olunur: “Layihə əsaslı təlim, təqdimatlar və praktik fəaliyyətlər şagirdlərin real bacarıqlarını inkişaf etdirməyə yönəlib. Lakin bu yanaşma hələ də geniş şəkildə tətbiq olunmur.”
Mütəxəssis vurğulayıb ki, balanslı yanaşma əsas şərtdir: “Təhsil sistemi həm akademik bilikləri, həm də həyat bacarıqlarını paralel şəkildə inkişaf etdirməlidir. Əks halda şagirdlər yalnız imtahan üçün hazırlaşmış olur.”
Sonda ekspert əlavə edib ki, “Məktəbin əsas missiyası şagirdi həyata hazırlamaqdır. İmtahanlar isə bu prosesin yalnız bir hissəsi olmalıdır.”