Bakı Şəhəri üzrə Təhsil İdarəsi tərəfindən (BŞTİ) müəllimlərə dəstək məqsədilə sertifikatlaşdırma prosesinə həsr olunmuş görüşlər keçirilib.
“Tehsil365” xəbər verir ki, İdarədən verilən məlumata görə, paytaxtdakı 20 nömrəli məktəb-liseydə keçirilən görüşlərdə BŞTİ-nin İnsan resursları sektorunun müdiri Aygün Bayramova, 49 nömrəli “İntellekt” məktəb-liseyinin psixoloqu Aysel Məmmədova, tarix, texnologiya, coğrafiya, musiqi, təsviri incəsənət və fiziki tərbiyə müəllimləri iştirak ediblər.
BŞTİ-nin sektor müdiri Aygün Bayramova dövlət ümumi təhsil müəssisələrində çalışan təhsilverənlərin sertifikatlaşdırılmasının əhəmiyyəti barədə danışıb, müəllimlərin sertifikasiya nəticəsinin onların karyera inkişafına və əməyinin stimullaşdırılmasına, təhsilin keyfiyyət göstəricilərinə təsirləri, sertifikatlaşdırma qaydaları haqqında məlumat verib.
Bakı şəhəri 49 nömrəli “İntellekt” məktəb-liseyinin psixoloqu Aysel Məmmədova imtahan öncəsi psixoloji hazırlıq barədə danışıb. A.Məmmədova müəllimlərin özünəinamı və motivasiyasının uğurlu nəticələr əldə etməyinə mühüm töhfə verdiyini bildirib.
Görüşdə sertifikatlaşdırma prosesi ilə bağlı qarşılıqlı fikir mübadiləsi aparılıb, müəllimləri maraqlandıran suallar cavablandırılıb.
Qeyd edək ki, təhsilverənlərin sertifikatlaşdırılmasında məqsəd ümumi təhsil müəssisələrində pedaqoji və idarəetmə fəaliyyəti ilə məşğul olan, ali və orta ixtisas təhsilinə malik təhsilverənlərin peşəkarlıq səviyyələrini və peşə yararlılıqlarını yoxlamaq, onların peşəkar inkişafına nail olmaq və təlim ehtiyaclarını öyrənməkdən ibarətdir.