Təhsil eksperti Esmira İbrahimova bildirir ki, xarici təhsil sistemlərinin bəzi uğurlu təcrübələri Azərbaycan təhsilində tətbiq oluna bilər.
Onun “Tehsil365”ə açıqlamasına görə, dünyada bir çox ölkənin təhsil modeli səmərəliliyi ilə seçilir və müəyyən elementlər digər ölkələr üçün faydalı ola bilər.
“Məsələn, Finlandiya təhsil sistemində şagirdyönümlü tədris əsas götürülür. Düzdür, bu prinsiplər bir çox ölkədə mövcuddur, bizdə də tətbiq olunur, amma Finlandiyada ev tapşırıqları azdır, dərslərdə isə daha çox praktiki fəaliyyətə üstünlük verilir. Ən önəmlisi isə müəllimlərə böyük etimad göstərilməsi və müstəqilliyin verilməsidir. Təəssüflər olsun ki, bizdə cəmiyyətdə müəllim nüfuzu azalıb və bu, təhsil keyfiyyətinə təsir edir,” – deyə İbrahimova qeyd edir.
Ekspert əlavə edir ki, Sinqapur təhsil sistemi xüsusilə riyaziyyat və elm fənləri üzrə güclü nəticələri ilə seçilir. Burada şagirdlərin fərdi bacarıqları nəzərə alınaraq fərqli proqramlar tətbiq olunur.
“Bu yanaşmanın Azərbaycanda da tətbiqi şagirdlərin uğurunu artırar və onların gələcək peşə seçimlərinə marağını gücləndirər,” – deyə İbrahimova vurğulayıb.
Cənubi Koreya təhsil sistemi isə yüksək akademik nəticələri və güclü intizam sistemi ilə tanınır. Burada texnologiya və rəqəmsal resurslardan geniş istifadə olunur ki, bu da şagirdlərin texnologiyaya marağını artırır və təhsilin modernləşməsinə imkan yaradır.
Esmira İbrahimova qeyd edir ki, hansı xarici model tətbiq olunursa-olsun, ilk növbədə cəmiyyətdə müəllimə hörmət və etimad qorunmalıdır.
“Müəllim psixologiyasını və pedaqoji yanaşmasını heç bir rəqəmsal proqram tam əvəz edə bilməz. Müəllim nüfuzu az olduqca, təhsildə qarşılaşacağımız çətinliklər də artacaq,” – deyə o əlavə edib.