Onun sözlərinə görə, bu inkişaf qəbul sistemində edilən dəyişikliklərlə sıx bağlıdır: “Qəbul sistemində sadəcə test yox, eyni zamanda dinləmə-anlama, hətta bəzi səviyyələrdə danışma bacarığı da ölçülür. Bu artıq doktoranturada tətbiq olunur və yaxın vaxtlarda magistraturada da nəzərdə tutulur.”
Təhsil eksperti Elçin Süleymanov “Tehsil365”ə açıqlamasında son illərdə xarici dil tədrisi ilə bağlı həm orta məktəblərdə, həm də ali təhsil müəssisələrində ciddi irəliləyişlərin olduğunu vurğulayıb.
Ekspert bildirib ki, dil öyrənmə imkanları genişlənib. Şagirdlər elmi-texnoloji vasitələrdən istifadə edərək orta məktəb dərslikləri ilə yanaşı əlavə resurslardan da faydalanırlar. Ali məktəblərdə isə ingilis dilli ixtisasların mövcudluğu, xaricdə təhsil almış müəllimlərin dərs prosesinə cəlb olunması və universitetlərin beynəlxalq elektron resurs bazalarına abunə olması tələbələrin dil biliklərinin inkişafına mühüm təsir göstərir: “Universitetlər tələbələrin ingilis dilini inkişaf etdirmək üçün müxtəlif tədbirlər görə bilər. Məsələn, ingilis dili zonaları elan oluna bilər, konversasiya klubları təşkil edilə bilər. Tədris dönəmində müəllimlər dərs proqramı hazırlayarkən xarici dildə, xüsusən ingilis dilində mənbələrdən istifadə etməlidirlər.”
Elçin Süleymanov əlavə edib ki, texnoloji imkanlar da dil öyrənməni asanlaşdırır. Müxtəlif proqramlar vasitəsilə zəif dil bilikləri olan tələbələr materialları öz dilinə çevirə bilir, bu isə onların ingilis dilli ədəbiyyatı tədris prosesinə qatmasına şərait yaradır.
Ekspert həmçinin universitetlərin beynəlxalq tələbə qəbulunu artırmasının da müsbət təsir göstərdiyini qeyd edib: “Çünki xarici ölkələrdən gələn tələbələrin anlama dili ingilis dili olur. Bu da praktiki imkanları artırır və tələbələrin dil bacarıqlarını inkişaf etdirir.”
Süleymanov hesab edir ki, universitetlərdə ingilis dili mühitinin yaradılması tələbələrin motivasiyasını artıracaq: “Əgər universitetin müəyyən bölgəsində yalnız ingilis dilində elanlar, yazılar və müzakirələr olsa, tələbələr gündəlik ünsiyyətdə bu dili daha rahat mənimsəyə bilərlər. Bu, həm akademik, həm də sosial mühitdə dil bacarıqlarının inkişafına böyük dəstəkdir.”