Azərbaycan elminin görkəmli nümayəndələrindən biri olan Aslan bəy Vəzirzadə zəngin elmi fəaliyyəti və çoxşaxəli maraqları ilə yadda qalıb.
“Tehsil365” xəbər verir ki, 1898-ci il yanvarın 6-da Bakıda anadan olan alim Cümhuriyyət dövründə xaricdə təhsil alan tələbələrdən biri kimi tanınıb.
Aslan bəy Vəzirzadə mineraloq və kristalloqraf kimi elmi sahədə mühüm tədqiqatlar aparmış, bu istiqamətdə dəyərli əsərlər müəllifi olmuşdur. O, uzun illər pedaqoji fəaliyyətlə məşğul olaraq gənc kadrların yetişməsində mühüm rol oynamış və professor elmi adına layiq görülmüşdür.
Alimin fəaliyyəti yalnız elm sahəsi ilə məhdudlaşmayıb. O, həm də filateliyaya böyük maraq göstərmiş, bir müddət Azərbaycan Filatelistlər Cəmiyyətinə rəhbərlik edərək bu sahənin inkişafına töhfə vermişdir.
Azərbaycan SSR əməkdar elm xadimi fəxri adına layiq görülən Aslan bəy Vəzirzadə 1984-cü ildə Bakıda vəfat edib. Onun elmi irsi bu gün də Azərbaycan elmi üçün əhəmiyyətli mənbə hesab olunur.