Müasir ali təhsil məkanında beynəlxalq əməkdaşlıq və akademik mobillik universitetlərin inkişaf strategiyasının əsas istiqamətlərindən biri kimi çıxış edir. Bu baxımdan, Azərbaycan Dillər Universitetində (ADU) həyata keçirilən Orhun layihəsi çərçivəsində görülən işlər xüsusi əhəmiyyət kəsb edir.
“Tehsil365” xəbər verir ki, Filologiya fakültəsində layihə çərçivəsində Qırğızıstan–Türkiyə Manas Universitetinin filologiya üzrə fəlsəfə doktorları Gülnur Karıbekova və Gülnarə Bayqobilova iki həftə müddətində xüsusi hazırlanmış proqram əsasında universitetdə mübadilə təcrübəsində iştirak edir. Bu müddət ərzində onlar tədris prosesinə cəlb olunurlar. Sözügedən qarşılıqlı fəaliyyət həm elmi biliklərin paylaşılmasına, həm də pedaqoji təcrübənin zənginləşdirilməsinə xidmət edir.
Layihə çərçivəsində Gülnarə Bayqobilova Filologiya fakültəsinin İngilis dili və ədəbiyyatı, eləcə də Rus dili və ədəbiyyatı ixtisaslarında “Dünya ədəbiyyatı” fənni üzrə dərslər aparır. Onun mühazirələrində dünya ədəbiyyatının müxtəlif istiqamətləri müqayisəli aspektdə təhlil olunur, tələbələrdə ədəbi proseslərə qlobal yanaşma formalaşdırılır.
Orhun layihəsi çərçivəsində həyata keçirilən bu kimi təşəbbüslər türk dünyası universitetləri arasında elmi əlaqələrin möhkəmləndirilməsinə, filoloji təhsilin beynəlmiləlləşməsinə və tələbələrin akademik dünyagörüşünün genişlənməsinə mühüm töhfə verir.
