Əqli Mülkiyyət Agentliyinin tabeliyində olan Respublika Elmi-Texniki Kitabxanası (RETK) tərəfindən Azərbaycan Dəmiryol Muzeyində təşkil olunan “İntellektual qatar” adlı kitab sərgisi başa çatıb.
Agentlikdən “Tehsil365"ə bildirilib ki, muzey və kitabxananın birgə layihəsi olaraq ilk dəfə həyata keçirilən bu tədbirin əsas məqsədi RETK-nin zəngin kitab fondunu geniş ictimaiyyətə təqdim etmək, elmi-texniki ədəbiyyata marağı artırmaq və oxucular arasında mütaliə mədəniyyətini təşviq etmək olub. Sərgi müddətində ziyarətçilər dəmiryol nəqliyyatı ilə yanaşı, avtomobil, dəniz və hava yollarına dair Azərbaycan, rus və ingilis dillərində nəşrlərlə tanış olmaq imkanı əldə ediblər.
Sərgidə 150 kitab nümayiş olunub. Çoxsaylı ziyarətçi muzeyə gələrək, nadir nəşrlərlə tanış olublar. Sərgidə ölkənin ali təhsil müəssisələrinin və kolleclərinin tələbə və müəllim heyəti fəal iştirak edib. Bakı Dövlət Universiteti, ADA Universiteti, Azərbaycan Dövlət İqtisad Universiteti, Milli Aviasiya Akademiyası, eləcə də Heydər Əliyev adına Hərbi İnstitut və digər təhsil ocaqlarının nümayəndələri sərgini ziyarət edərək, nümayiş olunan nəşrlərlə yaxından tanış olublar.