Rusiyanın Tatarıstan Respublikasının Azərbaycan Respublikasındakı daimi nümayəndəliyində məhdud imkanları olan insanlara dəstək olmaq məqsədilə mədəni-maarif tədbiri keçirilib.
Daimi nümayəndəlikdən “Tehsil365"ə bildirilib ki, tədbir “Humayun” Sosial Problemlərin Həllinə Yardım İctimai Birliyi və “Kayum Nasıri İnstitutu” Bakı Təhsil və Mədəniyyət Mərkəzi tərəfindən Azərbaycanın Tatar İcmasının iştirakı ilə təşkil olunub.
İştirakçılar arasında xüsusi qayğıya ehtiyacı olan uşaqlar və yeniyetmələr, onların valideynləri, müəllimlər, həkimlər, könüllülər, yaradıcı ziyalıların nümayəndələri və tatar icması olublar.
“Kayum Nasıri İnstitutu” Bakı Təhsil və Mədəniyyət Mərkəzinin direktoru Elmira Yusifli və “Lalə” tatar ansamblının musiqi rəhbəri Rəşad Yusifli qonaqlara salamlama nitqi ilə müraciət ediblər.
Tədbir “Humayun” QHT tərəfindən həyata keçirilən “Yurdum” sosial eko-kənd layihəsinin təqdimatı ilə başlayıb. Layihənin təsisçisi Zarema Yagizarova inklüziv gündüz mərkəzi, onun missiyası, əsas fəaliyyətləri və məhdud imkanları olan insanları dəstəkləmək, onların bacarıqlarını inkişaf etdirmək və bu şəxsləri sosiallaşdırmaq məqsədi daşıyan inklüziv təşəbbüslərin əhəmiyyəti haqqında danışıb.
Proqramda, həmçinin “Humayun” İB-nin direktoru Firəngiz Hüseynova və tələbə könüllülərin çıxışları da yer alıb.
Tədbirin yaradıcılıq hissəsinə mərkəzin uşaq və yeniyetmələrinin gündəlik fiziki məşq elementlərini nümayiş etdirən və “Tıq-tıq xanım” tamaşasını təqdim edən çıxışı daxil idi.
Musiqiçi və kolleksiyaçı Rəşad Yusifli uşaqları müxtəlif musiqi alətləri ilə tanış edib, bundan sonra iştirakçıların birgə yaradıcı improvizə ilə çıxışı olub.
Proqram mərkəzin tələbələri ilə birlikdə tatar mahnısı “Ay, canı” və Azərbaycan mahnısı “Yaşa Azərbaycan”ı ifa edən “Lalə” tatar ansamblının çıxışı ilə davam edib.
Tədbirdə Azərbaycanın Tatar İcmasının nümayəndələri də iştirak ediblər. Şairə Arzu Məmmədova qonaqlara öz tapmacalarını təqdim edib, qarmon ifaçısı İsmayıl Safin isə iştirakçıların cəmiyyətin direktoru Renat İlyazovla birlikdə dəstəklədiyi “Cücələrim” mahnısını oxuyub. Aktrisa A. Məmmədova Krılovun təmsillərini Azərbaycan dilində ifa edib.
Tədbir inklüziv mərkəzin işinə və onun tatar diasporuna təqdimatına görə Tatarıstan Respublikasının Azərbaycan Respublikasındakı daimi nümayəndəsi M. Qadılşinin adından “Humayun” İctimai Birliyinə təşəkkürnamənin təqdim edilməsi ilə başa çatıb.
Daha sonra iştirakçılar xatirə şəkli çəkdirib və qeyri-rəsmi söhbətlərini davam etdiriblər.
Görüş humanitar əlaqələrin gücləndirilməsi, inklüziv təşəbbüslərin dəstəklənməsi, ictimai və mədəni təşkilatlar arasında əməkdaşlığın inkişaf etdirilməsi üçün mühüm platforma rolunu oynayıb.