Ölkə üzrə ümumi (9 illik) orta təhsil səviyyəsi üzrə dünən keçirilmiş buraxılış imtahanı ilə bağlı sosial şəbəkələrdə müxtəlif iddialar səsləndirilir. İddialara əsasən, imtahana dərslikdənkənar mövzular düşüb, xüsusilə riyaziyyat fənni üzrə bəzi suallar səhv tərtib edilib.
“Tehsil365” xəbər verir ki,Dövlət İmtahan Mərkəzindən "Azərbaycan müəllimi"nin sorğusuna cavab olaraq bildirilib ki, imtahanın sualları təsdiqlənmiş kurikulum və dərsliklərə tam uyğun hazırlanıb, dərslikdən kənar heç bir sual olmayıb.
Səhv olduğu iddia edilən riyaziyyat sualı ilə bağlı DİM-dən bildirilib ki, bu tip açıq tapşırıqlar xüsusi qiymətləndirmə meyarları əsasında yoxlanılır və yalnız tam doğru cavabı müəyyən edən şagirdlər deyil, həmçinin həll prosesində düzgün aralıq nəticələr əldə edən və ya həll mərhələlərindən birini doğru yerinə yetirən şagirdlər də qiymətləndirmədə nəzərə alınır: "Ümumi təhsil səviyyəsi üzrə 5 aprel 2026-cı il tarixində keçirilən buraxılış imtahanında trapesiya mövzusuna aid təqdim olunan tapşırığın əsas məqsədi şagirdlərin iti bucağın tənböləni nəticəsində yaranan daxili çarpaz bucaqların bərabərliyini müəyyən etməsi və bu əsasda yaranan üçbucaqların oxşarlığından istifadə edərək tərəflər arasında nisbətləri tapmaq bacarığını yoxlamaqdır.
Tapşırıqda verilmiş ədədlər hər hansı bir üçbucağın tərəfləri kimi deyil, oxşarlıq nisbətlərinin qurulması üçün istifadə edilir. Bu ədədlərin seçilməsi həndəsi fiqurun mövcud olmasına deyil, ilk növbədə hesablamaların sadə və əlçatan aparılmasına xidmət edir. Başqa sözlə, bu tapşırıqda yoxlanılan bacarıq konkret bir üçbucağın mövcudluğunu üçbucaq bərabərsizliyi ilə təhlil etmək deyil, verilmiş həndəsi münasibətlərdən düzgün nəticə çıxarmaqdır. Buna görə də üçbucaq bərabərsizliyi ilə bağlı yanaşma tapşırığın həll prosesini və ardıcıllığını dəyişmir, eyni zamanda düzgün cavabın əldə olunmasına da heç bir maneə yaratmır", – deyə açıqlamada qeyd olunub.