“Tehsil365” İnformasiya Agentliyinə açıqlama verən qələm adamı və təhsil eksperti Şəmsi Qoca müasir texnologiyaların təhsil sahəsinə təsirindən danışıb.
Ekspert bildirib ki, ChatGPT və bənzəri süni intellekt alətləri artıq təhsil dünyasında yeni bir mərhələ formalaşdırır:
“Bu texnologiyaları mən rəqəmsal ‘mütaliə yoldaşı’ və genişmiqyaslı ensiklopedik xəzinə kimi qiymətləndirirəm. Onlar informasiyaya çıxışı inanılmaz dərəcədə sürətləndirir. Əvvəllər saatlarla kitabxanalarda axtardığımız məlumatı indi saniyələr içində əldə edə bilirik.”
Şəmsi Qoca vurğulayıb ki, süni intellekt təhsildə əsasən fərdiləşdirilmiş öyrənmə imkanları ilə seçilir:
“Hər bir şagirdin qavrama səviyyəsi fərqlidir. ChatGPT kimi alətlər fərdi yanaşma təqdim edərək mürəkkəb mövzuları sadələşdirir, dil öyrənmədə interaktiv mühit yaradır və yaradıcı düşüncəni stimullaşdırır. Bu baxımdan, o, yorulmaq bilməyən bir repetitor rolunu oynayır.”
Ekspert əlavə edib ki, bu texnologiyalar həm də müəllimlər və tələbələr üçün “beyin həmləsi” platforması rolunu oynayır:
“Mövzuların müxtəlif rakurslardan təhlili, yeni ideyaların yaranması və mətnlərin daha bədii formada təqdim edilməsi baxımından süni intellekt çox faydalıdır. Mən də hesab edirəm ki, texnologiyadan istifadə edərkən sözün estetik gücünü qorumaq vacibdir.”
Bununla yanaşı, o, mühüm bir məqama diqqət çəkib:
“Süni intellekt ‘sehrli çubuq’ deyil. Onun effektivliyi istifadəçinin verdiyi sualların keyfiyyətindən və alınan məlumatı tənqidi təfəkkür süzgəcindən keçirmək bacarığından asılıdır. Texnologiyanı mənimsəməliyik, lakin düşüncəmizin müstəqilliyini qorumaq şərtilə.”