Aprelin 6-da Azərbaycan Dillər Universitetinin (ADU) Linqvokulturologiya kafedrasının kollektivi Ekologiya və Təbii Sərvətlər Nazirliyində “Beynəlxalq Sıfır Tullantı Günü” münasibətilə təşkil olunmuş maarifləndirici görüşdə iştirak edib. Tədbirdə İngilis və Fransız Dilləri, İngilis və Alman Dilləri fakültələrinin tələbələri və ekokönüllülər də iştirak ediblər.
“Tehsil365” xəbər verir ki, görüş zamanı Nazirliyin sektor müdiri Mehman Nəbiyev çıxış edərək sıfır tullantı konsepsiyasının əhəmiyyətini, gündəlik həyatda tətbiq oluna biləcək ekoloji vərdişləri və təkrar emalın rolunu ətraflı təqdim edib. O, tullantıların azaldılmasının yalnız dövlət səviyyəsində deyil, hər bir fərdin məsuliyyətli yanaşması ilə mümkün olduğunu vurğulayıb.
Tədbir çərçivəsində tələbələrlə interaktiv müzakirələr aparılıb, sualları cavablandırılıb və ekoloji təşəbbüslərdə fəal iştirakın vacibliyi qeyd olunub. İştirakçılara sıfır tullantı həyat tərzini təşviq edən maarifləndirici materiallar təqdim edilib.
Görüş qrup işləri ilə davam etdirilib və tələbələr verilən mövzular üzrə hazırladıqları layihələri təqdim edərək öz baxışlarını paylaşmayıblar.
Tədbirin əsas məqsədi gənclər arasında ətraf mühitin qorunması, tullantıların azaldılması və düzgün idarə olunması sahəsində bilik və məlumatlılığın artırılması olub. Bu kimi təşəbbüslər gənclərdə ekoloji düşüncənin formalaşmasına və davamlı inkişaf məqsədlərinə töhfə verir.
Görüş həmçinin Ekologiya və Təbii Sərvətlər Nazirliyinin rəsmi sosial media səhifəsində işıqlandırılıb.
