Macarıstanın paytaxtı Budapeştdə Niderland rəssamı Vinsent Van Qoqa aid olduğu ehtimal edilən və indiyədək naməlum qalan tablo üzərində elmi tədqiqat aparılır.
“Tehsil365” xəbər verir ki, müvafiq məlumatı Macarıstanın "Origo" nəşri yayıb.
Budapeşt Rəsm Tədqiqat Laboratoriyasına əcnəbi kolleksioner tərəfindən bir neçə tablo təqdim edilib və onlardan biri tədqiqatçıların xüsusi marağına səbəb olub. Məlumata əsasən, sənətşünas Sofia Veqvarinin rəhbərlik etdiyi laboratoriyada boya, astar və kətanın ilkin ekspertizası aparılıb. Nəticədə rəsmin Vinsent Van Qoqun yaradıcılıq dövrünə, daha dəqiqi, təxminən 1885-1890-cı illər aralığına aid olduğu müəyyən edilib.
Tablonun vizual kompozisiyası dahi rəssamın 1888-ci ildə yaratdığı və hazırda Parisdəki Orse Muzeyində nümayiş etdirilən "Arlda rəqs zalı" əsərinə olduqca bənzəyir. Veqvari qeyd edir ki, əsər vizual olaraq eyni mövzunun alternativ variantı təəssüratı yaradır. Mütəxəssisin sözlərinə görə, Van Qoq qardaşı Teoya ünvanladığı məktublarında eyni motivin bir neçə nüsxəsini işləmək adətindən bəhs edib. Bu səbəbdən bənzər kompozisiyanın "ikinci variantı"nın mövcud olması nəzəri baxımdan istisna edilmir.
Veqvari bildirib ki, tablonun müəllifliyi ilə bağlı qəti fikir söyləmək hələ tezdir və tədqiqat işləri davam etdirilir. Hazırkı mərhələdə ekspertlər üslub və istifadə olunan materiallar əsasında rəsmin Van Qoqa aid edilməsini yalnız "mümkün" ehtimal kimi qiymətləndirirlər. Dəqiq və yekun qərar isə yalnız geniş və əhatəli analizlər başa çatdıqdan sonra açıqlanacaq.