Azərbaycan Dillər Universitetində (ADU) Xarici dillərin tədrisi metodikası (indiki İngilis dilinin tədrisi metodikası) kafedrasının elmi məsləhətçisi, görkəmli alim və pedaqoq Əli Səfiyevin 85 illik yubileyi münasibətilə onun evində ziyarət təşkil olunub.
“Tehsil365” xəbər verir ki, ziyarətdə Təhsil fakültəsinin dekanı, İngilis dilinin tədrisi metodikası kafedrasının dosenti, elmlər doktoru Firuzə Rzayeva, İngilis və Fransız dilləri fakültəsinin dekan müavini Zülqəddə Abdulkərimli, İngilis dilinin tədrisi metodikası kafedrasının müdiri, pedaqogika üzrə fəlsəfə doktoru, dosent Günay Şirəliyeva və kafedra əməkdaşları iştirak etmişlər.
Qeyd edək ki, Əli Səfiyev 1 aprel 1941-ci ildə Bakı şəhərində anadan olub. 1958–1963-cü illərdə M.F.Axundov adına Azərbaycan Pedaqoji Dillər İnstitutunda İngilis-Azərbaycan dilləri fakültəsində təhsil almış, 1963-cü ildə Sumqayıt şəhərindəki Boru-prokat zavodunda tərcüməçi kimi fəaliyyətə başlamışdır.
1963–1965-ci illərdə hərbi xidmətdə olmuş, 1965–1967-ci illərdə isə M.F.Axundov adına Azərbaycan Pedaqoji Dillər İnstitutunun Xarici dillərin tədrisi metodikası kafedrasında müəllim vəzifəsində çalışmışdır. 1967–1969-cu illərdə Misir Ərəb Respublikasında ingilis və rus dilləri üzrə tərcüməçi kimi fəaliyyət göstərmişdir.
1969-cu ildən bu günə qədər ADU-da Xarici dillərin tədrisi metodikası kafedrasında müəllim, baş müəllim, dosent, professor və elmi məsləhətçi vəzifələrində çalışaraq pedaqoji və elmi fəaliyyətini davam etdirir. 1993–2007-ci illərdə Tərcümə, Qiyabi və Axşam təhsili fakültələrində dekan vəzifəsini icra etmişdir.
Əli Səfiyev 20 elmi məqalə, 8 tezis, 3 kitab və 2 proqramın müəllifidir və Azərbaycan təhsil sahəsində uzunmüddətli fəaliyyəti ilə seçilən görkəmli alimlərdən biridir.
