Psixoloq Zeynəb Eyyubovanın sözlərinə görə, cəmiyyətdə ən çox rast gəlinən yanlış düşüncələrdən biri psixoloji problemlərin yalnız zəif insanlarda yarandığı fikridir. Halbuki psixoloji çətinliklər hər bir insanın həyatında müəyyən dövrlərdə ortaya çıxa bilər. Stress, həyat dəyişiklikləri, ailədaxili problemlər və digər faktorlar insanın emosional vəziyyətinə təsir göstərir. Bu isə zəiflik deyil, həyatın gətirdiyi təbii çətinliklərin nəticəsi kimi qiymətləndirilməlidir
Mütəxəssis “Tehsil365” ə açıqlamasında qeyd edir ki, digər geniş yayılmış yanlış fikirlərdən biri psixoloqa müraciət edən insanların ciddi psixi xəstə olduğu düşüncəsidir. Əslində isə psixoloqa müraciət etmək tamamilə normal və sağlam bir addımdır. İnsanlar yalnız ağır psixoloji problemlərlə deyil, gündəlik stress, narahatlıq, ünsiyyət çətinlikləri və ya özünü daha yaxşı tanımaq məqsədilə də psixoloq dəstəyindən yararlana bilərlər.
Z. Eyyubova vurğulayır ki, cəmiyyətdə yayılmış başqa bir yanlış yanaşma psixoloji problemlərin zamanla öz-özünə keçəcəyi düşüncəsidir. Bəzi hallarda bu mümkün olsa da, əksər vəziyyətlərdə problemlər vaxtında həll edilmədikdə daha da dərinləşə bilər. Bu baxımdan psixoloji vəziyyətə vaxtında diqqət yetirmək mühüm əhəmiyyət daşıyır.
Psixoloqun fikrincə, bəzi insanlar onun fəaliyyətini yalnız məsləhət verməklə məhdudlaşdırır. Halbuki psixoloq problemin kök səbəblərini müəyyənləşdirir, insanın emosional vəziyyətini anlamağa kömək edir və uyğun həll yollarını tapmaq üçün peşəkar dəstək göstərir.
Sonda mütəxəssis qeyd edir ki, bu kimi yanlış fikirlərin aradan qaldırılması üçün cəmiyyətdə psixoloji maarifləndirmə daha da gücləndirilməlidir. İnsanlar psixoloji sağlamlığın fiziki sağlamlıq qədər vacib olduğunu anlamalı və ehtiyac duyduqda mütəxəssisə müraciət etməkdən çəkinməməlidirlər.