Aprelin 2-də Azərbaycan Dillər Universitetinin (ADU) Filologiya fakültəsi nəzdində Xarici dillərin tədrisi metodikası kafedrasının təşkilatçılığı ilə “Xarici dillərin tədrisində aktual problemlər” mövzusunda təlim keçirilib.
“Tehsil365” xəbər verir ki, təlimdə açılış nitqi ilə çıxış edən sözü gedən kafedranın müdiri dos. Sevinc Hüseynova müasir dövrdə xarici dil biliklərinin əhəmiyyətini vurğulayaraq, bu cür təlimlərin müəllimlərin peşəkar inkişafı və tədrisin keyfiyyətinin yüksəldilməsi baxımından mühüm rol oynadığını qeyd edib.
Təlimçi qismində kafedranın əməkdaşları – dosent Mehbarə Qəribova, dosent Jalə Mehrəliyeva və baş müəllim Günel Eyvazlı çıxış ediblər. Tədbirdə Filologiya fakültəsinin dekanı, dosent Aynur Budaqova və digər kafedra müdirləri də qonaq qismində iştirak ediblər.
Təlimin əsas məqsədi xarici dil dərslərinin müasir metodik tələblərə uyğun planlaşdırılması, təşkili və qiymətləndirilməsi istiqamətində iştirakçıların bilik və bacarıqlarını inkişaf etdirmək olub.
Təlim çərçivəsində müasir tədris yanaşmaları, metodiki yeniliklər və qiymətləndirmə mexanizmləri geniş müzakirə edilib. İştirakçılara xarici dil dərslərinin planlaşdırılması, kommunikativ yanaşma və tələbə nailiyyətlərinin qiymətləndirilməsi mövzularında təqdimatlar nümayiş olunub. Eyni zamanda interaktiv müzakirələr aparılıb, təcrübə mübadiləsi həyata keçirilib.
Filologiya fakültəsinin dekanı dosent A. Budaqova da çıxış edərək müasir tədris yanaşmaları ilə bağlı dəyərli fikirlərini və praktiki təcrübələrini iştirakçılarla bölüşüb.
