Aprelin 3-də Azərbaycan Dillər Universitetində (ADU) TələbəPlus kartına həsr olunmuş infosessiya keçirilib.
“Tehsil365” xəbər verir ki, məlumat sessiyasının əsas məqsədi tələbələri TələbəPlus kartının imkanları, təqdim etdiyi üstünlüklər və tərəfdaş şəbəkəsi barədə məlumatlandırmaq, eyni zamanda onların suallarını cavablandırmaq olub.
Açılış nitqi ilə başlayan ADU-nun Tədris məsələləri üzrə prorektoru Şəfəq Şahməmmədova tələbələr üçün həyata keçirilən bu kimi layihələrin əhəmiyyətini vurğulayaraq, TələbəPlus kartının gənclərin gündəlik həyatına verdiyi töhfələrdən bəhs edib.
Sonra Təhsilin İnkişafı Fondunun nümayəndəsi Almaz Axundzadə çıxış edərək TələbəPlus kartı barədə təqdimatla çıxış edib. Çıxışı zamanı o, layihənin məqsədləri və istifadə imkanları haqqında məlumat verib. Çıxış çərçivəsində tələbələrin sualları cavablandırılıb.
Tədbirdə, həmçinin layihənin tərəfdaş qurumlarından olan “Olivia Beauty & Care” şirkətinin marketinq meneceri Aygün Mirzəliyeva çıxış edərək tələbələr üçün təqdim olunan güzəştlər və imkanlar haqqında danışıb.
İnfosessiyanın davamında dermatoloq Mehriban Almazova “Tələbə həyatında dəri problemləri” mövzusunda maarifləndirici təqdimatla çıxış edib, tələbələrə dəriyə qulluq və sağlamlıqla bağlı faydalı tövsiyələr verib.
Tədbir interaktiv formatda davam edib, sual-cavab sessiyası təşkil olunub və tələbələr arasında viktorina keçirilib. Viktorinanın qalibi xüsusi hədiyyə ilə mükafatlandırılıb. Bununla yanaşı, infosessiyada iştirak edən digər tələbələrə də müxtəlif hədiyyələr təqdim olunub.
